Atorfilittat nunaqqatiminnik salliutitsisarnerannik unnerluutiginninnini KNAPK-p ajuusaarutigaa
KNAPK sapaatit akunnerata siuliani politiinut unnerluutiginiarlugu Naalakkersuisoqarfik sioorasaarigaluarpoq, KNAPK naalakkersuisoqarfimmi atorfilittat savalimmiormiut islandimiullu avaleraasartoortassanik nunaqqatiminnut agguaassisimaneragaammat.
AAMMA ATUARUK KNAPK inuiaqatigiinnut pingaaruteqartussanik nalunaaruteqarniarluni tusagassiortunik katersortitsilersoq
KNAPK-lli oqaaseqaatini utertillugillu ajuusaarutigigai, aviisi Sermitsiaq allaaserisaqarpoq.
- Naalakkersuisoqarfiup ataatsimeeqatigaluta erseqqissaatigaa taamatut oqaaseqarnerput narrujuuminartutut isigalugu, tamannalu ajuusaarutigaarput, KNAPK-p siulittaasua Henrik Sandgreen Sermitsiamut oqarpoq.
Tusagassiortunik katersortitsinerminni "Atlantikup avannaamiut imminnut salliutittarnerannik" pisuutitsinertik tunuartippaat, kalaallilli aalisartut aalisarnermut inatsimmi nutaami salliutinneqartarnissaannik piumasaqaateqarnertik aalajangiusimaannarlugu.
AAMMA ATUARUK KNAPK-p aalisartut nunaqavissut pisinnaatitaaffii inatsisitigut ersarissaqqugai
Aalisarnermut naalakkersuisoqarfimmi pisortap Jørgen Isak Olsenip Sermitsiamut uppernarsarpaa KNAPK-p utoqqatsernera akuerisimallugu.
- Politiinut unnerluussisoqassanngilaq. KNAPK-p ajuusaarluni nalunaaruteqarneratigut suliap matuneqarnissaa innersuussutigissavara, naalakkersuisoqarfiup pisortaa aviisimut taama oqarpoq.
AAMMA ATUARUK Naalakkersuisoqarfiup KNAPK politiinut unnerluutiginialersaaraa