KNAPK: Tunisassiorfinnut kapisilinnik tuniseqqusaannginneq akuersaarsinnaanngilarput
KNAPK-mit tusagassiorfinnut nalunaarutigineqarpoq, Royal Greenlandimit tusarlerneqarsimallutik, naalakkersuisut suliffissuarmut ilisimatitsissutigisimagaat tunisassiorfinnut kapisilinnik ukiormanna tunisisoqassanngitsoq.
Ilisimatitsissut taanna Royal Greenlandimut aggustip aqqaneq aappaani nassiunneqartoq, Royal Greenlandimiit attaveqatigiinnermut ingerlatsisup Kate Hansenip uppernarsarpaa.
- Tamanna isertuussinnaanngilarput, avammut tusarliunneqareermat, Royal Greenlandimi tunisassiornermi pisortaq Lars Nielsen oqarpoq.
Aamma atuaruk Kapisilinniarneq aggustip 15-iani aallartissaaq
Killilerpaat
Tassalu inuussutissarsiutigalugu aalisartut namminneq nerisassaminnik aamma kalaalimineerniarfinni, suliffeqarfinnut, akunnittarfinnut assigisaannullu kapisilittaminnik taamaallaat tunisisinnaatitaapput. Naalakkersuisummi aalajangersimapput kapisilinnik aalisakkerivinnut tunisisoqarsinnassanngitsoq.
- Taamatut aalajangerneq KNAPK-mit akueriuminaatsinneqaqaaq, KNAPK-p siulittaasua Henrik Sandgreen tusagassiuutinut allappoq.
Aamma atuaruk Kapisilittavit nalunaarutiginissaat eqqaamallugu
Kapisillit aalisakkerivinnut 2012-miit siornamut tunineqarsinnaajuarsimagaluarput, maannali naamik.
Aalisartut piniartullu kattuffianniit tamanna akuersaaruminaatsinneqarpoq.
- Tamanna aalisartunut paasiuminaaqaaq. Nunatta pissarititaanik iluaquteqarnissamik Naalakkersuisoqatigiit oqaluttuannguarlutik aalajangiussaat paasiuminaaqaaq. Piffissaq kingullerpaaq tikillugu KNAPK sumilluunniit paasitinneqanngilaq qanoq aalajangilersaarnermik, taamaallaat paasiniaaneq akineqarpoq tusagassiutinut nalunaarutissamut utaqqilaaginnassaasi, Henrik Sandgreen oqarpoq.
Aamma atuaruk Karl-Kristian Kruse: Kapisilinniartarnermut pilersaarut nutaaq naapertuutinngilaq
Pisinissamut piareersimasut
Oktobarip 31-anni kingullermik kapisilinniartoqarsinnaavoq. Royal Greenlandimullu tunisisinnaaqqilernissamik KNAPK-miit kissaat piviusunngortissallugu tunisassiorfissuarmiit piareersimapput.
- Naalakkersuisut kapisilinnik ukiormanna tunisassiornissamut ammaassinissaq aalajangiutissappassuk, Royal Greenland nunatsinni tuniniagassanik kapisilinnik 10 tonisinik pisinissaminut piareersimavoq, Lars Nielsen oqarpoq.
Inuussutissarsiutigalugu aalisartut sunngiffimmilu aalisartut ukioq manna kapisilittassaat 45 tonsiupput.
Aalisarnermut naalakkersuisoqarfik KNR-mit oqaaseqartinnissaanut attavigisimagaluaratsigu iluatsinngilarput.