Kapisilinniarneq aggustip 15-iani aallartissaaq
Kapisilinniarneq arfininngornermi aggustip 15-iani ammaanneqassaaq oktobarillu 31-ani unitsinneqassalluni, imaluunniit pisassiissutigineqartut tamakkerneqarnissaasa tungaanut, Aalisarnermut, Piniarnermut Nunalerinermullu Naalakkersuisoqarfik taama ilisimatitsivoq.
Inuussutissarsiutigalugu aalisartut namminneq nerisassaminnik aammaLU kalaalimineerniarfinni, suliffeqarfinnut, akunnittarfinnut allanullu tunisassaminnik kapisilinniarsinnaatitaapput. Inuussutissarsiutigalugu aalisartut tamarmik aalisarsinnaanermut akuersissuteqassapput.
Sunngiffimmi aalisartut namminneq nerisassaminnik kapisilinniarsinnaapput. Sunngiffimmi aalisartut aalisarsinnaanermut akuersissuteqarnissaannik maannakkut piumasaqartoqanngilaq, tamannali aappagu piumasaqaataalissaaq.
AAMMA ATUARUK Kapisilinniartarnissamut siunnersuut Krusep utertinngilaa
AAMMA ATUARUK QSIP: Saniatigooralugu aalisartut aamma kapisilittassaqarlik
Pisat tamaasa nalunaarutigineqartassapput
Pingaaruteqarluinnarpoq kapisilittarineqartut tamaviisa nalunaarutigineqarsimanissaat, tamanna siunissami kapisilinniartarnissamut pingaaruteqarluinnartuummat. Taamaattumik tamanna erseqqissaavigissallugu pingaaruteqarluinnarpoq.
Inuussutissarsiutigalugu sunngiffimmilu aalisartut pinngitsooratik pisaminnik nalunaarutiginnittussaatitaapput, qassusiareersimanerit tamaasa pisatik nalunaarutigisassallugit. Kapisilittarineqartut Kalaallit Nunaanni Aalisarsinnaanermut Akuersissutinik Nakkutilliisoqarfimmut, KANUAANA-mut sianerlutik qarasaasiakkulluunniit nalunaarutigisassavaat.
Naalakkersuisoqarfiup malittarisassanut nalunaaruteqartarnermullu tunngatillugu paasisitsiniaanerit annertusiniarpai pitsaanerusumik nalunaarutiginnittalernissaq qulakkeerniarlugu, soorlu aamma KANUAANA-p kapisilinniarfiup nalaani nakkutilliineq annertusiniaraa.
