Kapisilittavit nalunaarutiginissaat eqqaamallugu

Kapisilinniarneq arfininngormat aggustip 15-iani aallartippoq, tassungalu atatillugu kapisilinniartut, inuussutissarsiutigalugu aalisartuugunik sunngiffimmiluunniit aalisartuugunik, pisatik pinngitsuunngivillugit nalunaarutigisussaavaat. Kapisillit qassutinik, qarsorsanik qissataatinilluunniit pisaappata tamaasa nalunaarutigisussaallugit.
Allattoq Simon Uldum -
aggustip 17-at 2015 06:40

Qassusiareernerit tamaasa pisat nalunaarutigineqartassapput. Kapisilittarineqartut Kalaallit Nunaanni Aalisarsinnaanermut Akuersissutinik Nakkutilliisoqarfimmut, KANUAANA-mut allakkatigut, faxikkut mailikkulluunniit nalunaarutigineqassallutik.

KANUAANA-mit erseqqissaatigineqarpoq kapisilittarineqartut tamaviisa nalunaarutigineqarsimanissaat pingaaruteqarluinnartoq, tamanna siunissami kapisilinniartarnissamut pingaaruteqarluinnartuummat.

AAMMA ATUARUK Kapisilinniarneq aggustip 15-iani aallartissaaq

Inuussutissarsiutigalugu aalisartut namminneq nerisassaminnik aamma kalaalimineerniarfinni, suliffeqarfinnut, akunnittarfinnut allanullu tunisassaminnik kapisilinniarsinnaapput, Inuussutissarsiutigalugulu aalisartut tamarmik aalisarsinnaanermut akuersissuteqassapput.

Sunngiffimmi aalisartut namminneq nerisassaminnik kapisilinniarsinnaapput. Sunngiffimmi aalisartut aalisarsinnaanermut akuersissuteqarnissaannik maannakkut piumasaqartoqanngilaq, tamannali aappagu piumasaqaataalissasoq Aalisarsinnaanermut Akuersissutinik Nakkutilliisoqarfiup ilisimatitsissutigaa.

Inuussutissarsiutigalugu aalisartut  sunngiffimmilu aalisartut ukioq manna kapisilittassaat 45 tonsiupput.

Kapisilinniat ingerlaqqiffissami uani sullissvik.gl-imi imersugassaq immersoriarlugu GFLK@nanoq.gl-imut nassiuttassavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq