KNAPK: Puisit amiisa KNR annaassinnaanngilaat
Anda Uldum Demokraatineersoq siunnersuuteqarpoq puisit amiinik tunisinermi tapiissutit 5 millioner koruuninik ilanngarlugit aammalu Inuit issittormiut siunnersuisooqatigiinnut tapiissutit 5 millioner koruuninik ilanngarlugit aningaasat KNR-mut nuunneqarsinnaasut.
Puisit amerpassui tunineqarsinnaanatik quersuarni uninngaannarput, taamaammat taakkununnga tapiissutit ilanngarnissaat Anda Uldumip siunnersuutigaa. Kisianni puisit amiinik tunisinerup illersornissaani piniartut ICC pinngitsoorsinnaanngikkaat KNAPKp siulittaasua Leif Fontaine oqarpoq.
- Demokraatit inuiaqatigiit aaqqissuussaaneranni suleqataaniarnerminni taama inuppalaanngitsigisumik siunertaqarnerat kanngunartutut maajunnartutullu nalilertariaqarpoq, Leif Fontaine oqarpoq.
Uumasunik illersuiniaqatigiit EU-llu tatisinerisigut puisit amiisa tuniniarnerat ajornakusoortorujussuanngorpoq. KNAPK isumaqarpoq puisit amiinik tunisinermut tapit ICC-llu nunat inoqqaavisa pisinnaatitaaffiinik sorsuutiginnilluni illersuinera pinngitsoorneqarsinnaanngitsut.
- KNAPK-mi isumaqarluinnarpugut Demokraatit siunnersuutsik utertittariaqaraat, aningaasanillu nassaarniassagunik inuiaqatigiit atukkamikkut oqimaatsorsioreersut aallerfiginagit allaffissornikkut sipaarniuteqarneq aqqutigalugu aningaasarsiortariaqartut, Leif Fontaine oqarpoq.
