KNAPK umimmaat pillugit suliamut: Ajorluinnartoq kukkunerusorlu
Umimmaat 30-t siumorneqarsimasut, Upernavimmilu politiinut sapaatip akunnera kingullermi pingasunngornermi nalunaarutigineqartut, aalisartut piniartullu kattuffiata KNAPK-p quarsaarutigai.
Umimmaat taakkua 30-t sumiiffinni pingasuni, Arfertuarsummi, Uummannap tungaaniit tikinneqartartumi aamma Millorfimmi Amitsumilu, Upernaviup tungaaniit tikinneqartartuni, toqorarneqarsimasut siumorneqarsimapput.
Tamannalu KNAPK-mit akuersaarneqarsinnaanngilluinnarpoq.
- Quarsaarnarpoq. KNAPK-mit ilaasortarpassuinillu aamma nakeriallaatigineqaqaaq, KNAPK-p siulittaasua Henrik Sandgreen tusagassiuutinut nalunaaruteqarluni taama oqarpoq.
AAMMA ATUARUK Piniartut peqatigiiffiat toqoraaneq pillugu: Umimmattassiissutit sipporneqartarnerat nalinginnaavoq
Tamatuma saniatigut aamma KNAPK-p Upernavimmi immikkoortortaqarfianit KNR-imut oqaatigineqarpoq piniartut ilaannut nalinginnaasunngorsimasoq pisassiissutigineqartut sipporlugit pisaqartarnerat.
Ajorluinnartoq kukkunerusorlu
Upernavimmi aalisartut piniartullu peqatigiiffianni Paalunnguaq Løvstrøm siulittaasuuvoq. Taanna KNR-imut ippassaq oqarpoq Upernaviup eqqaani piniartut ilaannut, umimmammik ataatsimik pisaqarsinnaanermut akuersissummik tuninineqarsimasunut, ukiuni kingullerni nalinginnaasunngoriartorsimasoq umimmanniarnerminni immikkut aamma pisaqartalersimanerat.
- Kisianni uanga aatsaat taama amerlatigitillugit tusarpakka. Soorunami uggornarpoq, Paalunnguaq Løvstrøm oqarpoq.
”Namminersorlutik Oqartussat nalunaarutaat nr. 8 umimmaat illersugaanerat piniagaanerallu pillugit 27. juni 2013-imeersoq”
- Paragraf 12: Umimmaap pisarineqartup neqaa tamaat pisaqarfimmiit nassarneqassaaq. Pisap sinneri sapinngisamik pisaqarfiup qimalernerani nassarneqassapput imaluunniit tupeqarfiit, illuaqqat akiliuteqarluniluunniit aallaaniarnerup ingerlanneqarneranut akornusiinatik inissineqassallutik.
- Paragraf 26: Nalunaarummi matumani aalajangersakkanik unioqqutitsinermi akiliisitsineq pineqaatissiissutaasinnaavoq kiisalu sunngiffimmi aallaaniarsinnaanermut allagartaqarsinnaaneq ima-luunniit inuussutissarsiutigalugu piniarnermut allagartaqarsinnaaneq arsaarinnissutaasinnaapput.
Kattuffiullu siulittaasuanit tusagaq tamanna nuannarineqanngilluinnarpoq:
- Soorunami ajuusaarnartorujussuuvoq. Aamma naatsorsuutigiuaannartaratsigu pisassiissutigineqarsimasut malillugit piniarnerit ingerlanneqartartut, Henrik Sandgreen oqarpoq.
- Taamatut iliorsinnaaneq sumiiffiit ilaanni nalinginnaasutut isigineqalersimappat, taava ajorluinnartumut kukkusumullu killissimassaagut.
Henrik Sandgreen taamaammat isumaqarpoq piniakkanik killilersukkanik piniarnerup nalaani nakkutilliisoqartarneq nalilersorneqaqqittariaqartoq.
- Nakkutilliisoqarpugut. Nakkutilliisullu pitsaanerusumik nakkutilliinissaat saneqqussinnaanngilarput, oqarpoq.
Henrik Sandgreenimit eqqaamaqquneqarpoq aalisartut piniartullu kattuffiata aalisarnermik aamma piniarnermik inuussutissarsiuteqarnerup nunarsuarmioqatitsinnit akuersaarneqarnissaa ukiorpassuarni sulissutigineqarsimasoq.
- Taamaammat pisoq una piniartunit nikalluallaatigineqaqaaq, Henrik Sandgreen oqarpoq.
AAMMA ATUARUK Umimmaat qimaannakkat: Toqoraaneq piniarnermut allagartamik naleqarsinnaavoq
KNAPK aalisartunit piniartunillu 1953-mi pilersinneqarpoq, Henrik Sandgreenillu oqarnera naapertorlugu piujuaannartitsinissamut isuma malittarisassani pingaarnerpaatinneqartuaannarsimavoq.
Pinartutut suliarineqartussanngortoq
- Taamaammat Upernaviup eqqaani uumasunut taamatut sussaanngitsigisumik iliorneq inuiaat imaani nunamilu uumasunik atuilluarnissamik siunertaqarlutik inuusunut mikinngitsumik innarliineruvoq akuerineqarsinnaanngitsoq, Henrik Sandgreen, pisoq pinartutut isigalugu kattuffiup piniarneq pillugu siunnersuisoqatigiivini oqaluuserineqartitsiniartoq, taama oqarpoq.
KNAPK-miilli ilaasortanut kinguneqartitsinissamik piffissami matumani pilersaaruteqartoqanngilaq.
- Paasitinneqarnerpummi naapertorlugu misissuisoqaleruttorpoq. Taakkua inernerisa uagut qanoq ingerlariaqqinnissarput aalajangerumaarpaat. Taamaammat siusippallaarpoq uagut kinguneqartitsisinnaanerput, oqarpoq.
