KNAPK-p qilalukkap qaqortap avammut tunisassiarineqarnerata inerteqqutaanera isornartorsioraa

KNAPK-p piniarnermut siunnersuisoqatigiivi ammasumik allagaqarlutik naalakkersuisut qilalukkanik qaqortanik avammut tunisassiorsinnaanermut inerteqquteqarallarnerat pillugu isornartorsiuipput.

Inerteqquteqarnermi tunumi qilalukkanik qaqortanik piniarneq nunat tamalaat inatsisaannut akerliunera pissutaavoq, taamaammat qilalukkanik qaqortanik avammut Danmarkimut tunisassiorneq matuneqavippoq. Piffissamilu matumani qilalukkat qaqortat tunisassiarineqartut tunumeersut nunattalu kitaaneersut immikkoortinneqarsinnaanngikkallarnerat pissutigalugu Naalakkersuisut qilalukkanik qaqortanik avammut tunisassiornermut inerteqquteqalerput.

Qilalukkanit qaqortanit tunisassianik unitsitsisoqarallartoq, Naalakkersuisut tusagassiuutinut nalunaarutaanni allassimavoq. Taamalu oqaasertaliorneq KNAPK-p piniarnermut siunnersuisoqatigiivisa immikkut ittumik maluginiarpaa:

- Nunatsinni ullumikkut qilalukkat qaqortat qernertallu neqaanik mattaannilluunniit avammut niuerutissanik tunisassiortoqanngilaq tunisassiorfeqaranilu, siunnersuisoqatigiit ammasumik allakkaminni allapput.

Uanilu Pisiffiup Brugsenillu neqaarniarfii qilalukkanik qaqortanik nunatta iluani nunattalu iluinnaani tunisassiortarnerat eqqaassanngikkaanni.

- Kisianni imaappoq nunatsinniit qilalukkat neqaannik mattaannilluunniit avammut nioqqutissiortoqaranilu niuertoqanngilaq nunatta kitaani kangianilu, siunnersuisoqatigiit oqarput.

Timmisartukkut mattammik nassarneq

Nunatsi9nnit Danmarkimut angalasut qilalukkat qaqortap mattaani neqaanillu nammineq atugassaminnik suli nassarsinnaapput. Taamaalilluni inerteqquteqarallarneq qilalukkamik qaqortamik tunisassiarineqartunut nunatsinniillu nassiunneqartunut kisimi atuulluni.

Tamannalu KNAPK-p piniarnermut siunnersuisoqatigiivinit aamma isornartorsiorneqarluni naalakkersuisut inerteqquteqarunnaaqquaat:

- Kalaallit Danmarkimut 5 kg. angullugu qilalukkat qaqortat neqaanik mattaanillu ilaquttaminnut ikinngutiminnulluunniit nassiussisinnaanerat ingerlaannaq ammaateqqinneqartariaqarpoq, taakkuami niuernikkut ingerlanneqanngimmata inuit namminneq nerisassaattut nassiussaammata.

- Inuit pisinnaatitaaffii eqqaamaneqarlik

Tassunga atatillugu qilalukkat qaqortat qernertallu kalaallit piorsarsimassusaannut inuussutissaqarnerannut pingaaruteqartut siunnersuisoqatigiit erseqqissaapput.

Taamaammat siunnersuisoqatigiit naalakkersuisunut Naalagaaffiit Peqatigiit (FN) inuit pisinnaatitaaffiinik eqqaamanninnissaannik kaammattuuteqarput:

- Nunap inuiisa inuussutissarsiornikkut nerisassaqarniarnikkullu  atugarisaat pisinnaatitaaffiilu pillugit FN-ip isumaqatigiissutai naapertorlugit ingerlatsinissaq innersuussutigineqassaaq, siunnersuisoqatigiit allapput.