Qilalukkat qaqortat mattaannik neqaannillu Danmarkimut nassiussisoqarsinnaanera mattunneqartoq: - Malugisinnaavarput timerput pisariaqartitsisoq
Kalaaleqatigut Danmarkimiitut piffissami aggersumi mattaguttussanngorunarput. Tunumimi qilalukkat qaqortat piniaqqusaanngikkaluartut pissutaalluni, qilalukkat qaqortat mattaannik neqaannillu nunatsinniit Danmarkimut nassiussisoqarsinnaanera mattunneqarpoq.
Danmarkimi kalaaleqativut qilalukkap qaqortap mattaanik nunatsinniit maannamut nassiussarsisinnaasimapput, tamannali maanna unitsinneqarpoq, Tunumimi qilalukkat qaqortat piniaqqusaanngikkaluartut Naalakkersuisut ukiuni tallimani atuuttussamik 30-nik siorna ukiakkut pisassiinerat pissutaalluni, qilalukkat qaqortat mattaannik neqaannillu nunatsinniit Danmarkimut nassiussisoqarsinnaanera mattunneqarpoq.
Qilalukkat qaqortat uumasut nujuartat naasullu nungutaanissamut ulorianartorsiortut nunani tamalaani niueqatigineqartarnerat pillugu isumaqatigiissummi CITES-imik taaneqartartumi ilaatinneqarput.
Naalakkersuisulli siorna ukiakkut tunumi ukiuni tallimani atuuttussamik teknikkikkut taaneqartumik 30-nik pisassiinerat pissutaalluni qilalukkat qaqortat mattaat neqaallu kitaaneersut ilanngullugit Danmarkimut nassiuteqqusaajunnaarput.
Tamanna Naleqqap politikkikkut oqaaseqartartuata Jens Napãtôk’-p akuersaarsinnaanginnerarpaa.
- Taama ilaqutariiaarlutik ataatsikkut piniartarnerat aqqutissiuunneqartariaqarpoq, aamma peqqissarlutik uninngasut amerlasoorpassuit kalaaliminertortarnissartik pisariaqartittorujussuuaat, taamaammat immikkut paasinnilluni qallunaat nunaat inissittariaqalerpoq.
Jens Napãtôk’ Qanoruumut taama oqarpoq.
Mattak kuffertimi nassarlugu
Qilalukkat qaqortat mattaannik neqaannillu nunatsinniit Danmarkimut nassiussisoqarsinnaanerata mattunneqarnera Laila Bertelsenip, Brøndbymi najugallip uggoraa:
- Kingullermik qilalukkap mattaanik tunitippunga januaarimi, annikikkami ingerlaannaq nunguppoq, taava massakkut marsimiipugut aamma malugisinnaavarput timerput pisariaqartitsisoq. Laila Bertelsen Qanoruumut taama oqarpoq.
Qilalukkat qaqortat mattaat kitaaninngaaneersuunerat tunuminngaaneersuunerallu apeqqutaatinnagu Danmarkimut nassiunneqarsinnaangoqqinnissaat Naalakkersuisut suliniutigisariaqaraat Naleqqap politikkikkut oqaaseqartartuata Naalakkersuisunut kaammattuutigaa.
Nunatsinniit Danmarkimut angalasut nammineq nerisassaminnik qilalukkap qaqortap mattaanik neqaanilluunniit nassarsinnaanerat mattunneqanngilaq, taamaammat Laila Bertelsen neriuutissaqalaarnerarpoq.
- Sinnattuaqissutigisinnaavara arlaatigut arlannguata nassaassinnaassagaanga, nassiussinnaannginnamikku.
Laila Bertelsen, Brøndbymi najugalik, Qanoruumut taama oqarpoq.
Qilalukkat qaqortat mattaasa nunatta kitaaneersut Danmarkimut nassiunneqaqqissinnaangornissaat suliniutigineqartoq pineqartumi Naalakkersuinikkut akisussaasoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund tusagassiutinut allappoq.
