KNAPK-p Kruse sakkortuumik isornartorsioraa
Aalisartut piniartullu kattuffiata, KNAPK-p, aalisarnermut naalakkersuisoq, Karl-Kristian Kruse, sakkortuumik isornartorsiorpaa.
Aalisarnermi suliniutit kingulliit inuussutissarsiutimut aserorterissasut, tamatumalu malitsigisaanik aalisartorpassuit pisortanit ikiorserneqartariaqalissasut, kattuffik isumaqarpoq.
Naalakkersuisup allanngueqattaarnera aalisartut inuussutissarsiornerannut ajornerulersitsisoq, KNAPK-p siulittaasua, Henrik Sandgreen tusagassiuutinut nalunaaruteqarluni allappoq.
Aalisarnermut naalakkersuisoq Naalakkersuisut aalisarnermi akitsuusersuiniarnerannut naggataatigut akisussaaqataasoq, KNAPK allappoq.
Aalisarnermit akitsuutitigut 50 millionit koruuninik aappaagu aallerniarneq matumani pineqarpoq.
AAMMA ATUARUK Aalisakkat annerusunik akileraaruserniarneqarneri ataatsimiititaliap isumakuluutigigaa
- Sineriammi aalisartut aatsaat taama sakkortutigisumik atugaqalissapput, qularnanngitsumillu aalisarnermit anisariaqartussat ikittuinnaanavianngillat, Henrik Sandgreen, aningaasaqarnermut naalakkersuisoqarfiup akitsuusersuinermut siunnersuutaa pillugu taama allappoq.
Akitsuutit qaffasinnerusut nunatsinni aalisarnerup inuussutissarsiutitut nunanut allanut unammillersinnaaneranut ajoqutaassasut, Sandgreen isumaqarpoq.
Aalisarnernik nunanullu allanut tuniniaanermik inuussutissarsiuteqartut Sulisitsisut Peqatigiiffianni siulittaasuat, Henrik Leth akitsuutinut assingusumik isornartorsiuivoq.
AAMMA ATUARUK Aalisarnermi akitsuutit nutaat isornartorsiorujussuarneqartut
Inatsisartut aningaasaqarnermut akileraartarnermullu ataatsimiititaliaata siunnersuummik suliaqarnermini akitsuutit qaffasissusaannut ernumanarnerarpaa.
Nunatsinni akitsuutit Savalimmiuni Islandimilu akitsuutinut naleqqiullugit qaffasinnerpaajoreertut ataatsimiititaliap tunngavilersuutigaa.
Akitsuutit nutaat soraarnerussutisiaqarnissamullu pinngitsoorani ukiortaamit akiliuteqartalernissaq aalisartorpassuarnik inuussutissarsiutiminnik unitsitsisariaqarnerannik kinguneqassasoq, Henrik Sandgreen isumaqarpoq.
