Aalisakkat annerusunik akileraaruserniarneqarneri ataatsimiititaliap isumakuluutigigaa
Naalakkersuisut aalisarnermit koruuninik 50 millioninik akileraaruseeqqinnikkut pissarserusupput, taamaattumillu isumalluutinut akileraarusersueriaatsit nutaat Inatsisartutiguussapput.
Sulisitsisullu Peqatigiiffiani aalisarnernik nunanullu allanut tuniniaanermik inuussutissarsiuteqartut siulittaasuata, Henrik Lethip akileraarutit nutaat sakkortuumik ataasinngormat isornartorsiorpai.
AAMMA ATUARUK Aalisarnermi akitsuutit nutaat isornartorsiorujussuarneqartut
- Raajanut akitsuut qaffappoq qaleralinnullu akitsuutit pingasoriaatinngungajapput ilutigitillugulu kilisaataatillit inuussutissarsiornerminni tunngaviiarniarneqarlutik. Taamaaliornikkut soorlu 90-ikkunnitut umiarsuaatillit isertitatigut tunngavissaarullutik akiliisinnaajunnaarput, Henrik Leth aarlerisaarivoq.
Isertitsissutaasartussat aningaasanut inatsimmut pisariaqartut
Inatsisartut aningaasanut akileraarnermullu ataatsimiititaliaata aamma akileraarusersuinerit isumakuluutigaat. Ataatsimiititaliaq siunnersuutip Inatsisartuni ullumi aappassaaneerneqarnissaanut isumaliutissiissummini allappoq, maluginiarsimallugu kalaallit aalisartui Savalimmiunut Islandimullu naleqqiullutik malunnartumik annerusumik akileraartartut.
- Ataatsimiititaliaq allappoq nunat taama assigiinngitsigisumik pineqarnerat piffissap ingerlanerani kinguneqanngitsoornavianngitsoq, eqqoriarlugulu taama akileraarusersuinerup kalaallit aalisartut sinneqartoorutigisartagaat sunninngitsoornavianngikkai aalisarnermilu aningaasaleeqqissinnaanerat sunnerlugu.
AAMMA ATUARUK Aalisarnermut inatsisissatut siunnersuut naalakkersuisooqatigiit isumaqatigiissutaannut akerliusoq
Aningaasanulli inatsit 2018-imoortoq imminut atassappat Inatsisartut akileraarutit nutaat akuerisariaqarpaat.
Inatsisartunut akissummini aningaasaqarnermut naalakkersuisoq Aqqaluaq B. Egede allappoq akileraarutit nutaat ukiumut 50 millioner koruuninik isertitsissutaasartussat pisariaqartut.
Ataatsimiititaliaq: nutaamik akileraarusersueriaaseq kinguartinneqarsinnaavoq
- Isertitaqarnerussutissat aningaasanut inatsisissatut siunnersuutip pingajussaaneerneqarnerani atortussanngortinneqarnissaa naatsorsuutigineqarpoq, tamannalu 2018-imut aningaasanut inatsisissatut siunnersuutip oqimaaqatigiissinnissaanut pingaarutilimmik toqqammaviussasoq, Aqqaluaq B. Egede akissummini taama allappoq.
Aalisarnermut inatsisissatut siunnersuummut akileraarutit nutaat akerliunerarlugit Henrik Lethip isornartorsiorpaa, aalisarneq amerlanernut siammarneqarniarmat taamaalillunilu isertitat annikillisillugit.
AAMMA ATUARUK Politikkikkut siunertarineqartoq aningaasanit pingaarnerusoq
Aningaasanut akileraarnermullu ataatsimiititaliap tamanna aamma malugaa siunnersuutigalugulu Naalakkersuisut akitsuutit pioreersut qaffassinnaagaat, taamaalilluni aalisarnermut inatsisissap sunniutai ilisimaleraanni aatsaat nutaamik akileraarusersueriaaseqalerluni.
