KNAPK Sulisitsisullu: Naalakkersuisut ilaatinnata aalajangiisarput

Naalakkersuisut allanik siunnersorneqaratik aalajangiiunnaartariaqarput.

Tassungalu taarsiullugu Naalakkersuisut aalajangiineranni eqqugaasussat aalajangiinissamut oqaloqatigineqartariaqartut, Kalaallit Nunaanni Aalisartut Piniartullu Kattuffiat Sulisitsisullu isumaqarput.

Politikkikkut aqutsisunut tatiginninneq annikilliartortoq, KNAPK-p siulittaasua, Henrik Sandgreen oqarpoq.

- Ilaatigut naaperiuteqarpallaarani aalajangeeriataartarneq maannakkut takusinnaasagut malillugit ajoraluartumik assiliaavoq. Uagut ilaasortatta akornanni politikkikkut ingerlatsinermut tatiginninneq ajoraluartumik sukkasuumik kipusumut aallariartulersoq aamma takusinnaavarput, Henrik Sandgreen oqarpoq.

Taassuma oqarnera naapertorlugu aalisarnermut siunnersuisooqatigiinnit tusarniaanermit akissut assersuutigalugu Naalakkersuisut aalajangiinerannut ilaatinneqanngilaq. Tamatuma saniatigut tusarniaanermut piffissaq suliamik misissueriarluni akissuteqarluarnissamut naammanngitsoq, taanna isumaqarpoq.

AAMMA ATUARUK Aalisartut ikiorsiissutinut utaqqikatattut

KNAPK-p aalisartunut coronap ilungersunartorsiortitsinerani pissutsit pillugit ikiorsiissuteqarnissaq sulissutigileruttorpaa.

Ikiorsiissutit aalisarnernut pitsaanerpaamik naleqqussarneqarlutillu akerliliissanngippata qanimut oqaloqatigiittoqartariaqarlunilu suleqatigiittoqartariaqarpoq.

- Uani naapinniarnermi suliaqarnermi oqaloqatigiinnerit ullumikkornit annertunerujussuit aamma ingerlanneqarsinnaagaluarput, Henrik Sandgreen oqarpoq.

Taassuma kattuffiup ilaasortai qassiiusut aalajangersimasumik nalunaaruteqarlutik saaffiginnittalersimasut oqaatigaa.

- Peqquneqassagunik tusaajumaneqaratik aalisarumajunnaarsinnaanerminnut piareeqqanertik nalunaarutigisaqattaalerpaat, KNAPK-p siulittaasua oqarpoq.

AAMMA ATUARUK KNAPK-ip umiarsualivinnut akiliisitsisoqartalernissaa nangaassutigigaa

Naalakkersuisullu akuutitsinngikkunik ilisimasarparujussuit annaaneqassasut, Sulisitsisut pisortaat, Brian Buus Pedersen oqarpoq.

- KNAPK-jusinnaavoq, NUSUKA-sinnaavoq uaguusinnaallunilu. Kattuffiit allaasinnaapput. Pissutsinummi suliarineqartunut ilisimasarujussuaqarput. Taakkulu ilisimasaat ingerlatsivinermi ilisimaneqanngitsut iluaqutaalluarsinnaapput, taamaalilluni silatusaartumik aalajangiisoqarluni, ilisimasat eqqortut aalajangiinermi ilaatinneqarsinnaapput, Brian Buus Pedersen oqarpoq. 

Taassumalu Naalakkersuisunit naammattumik ilaatinneqannginneq naammagittaalliutigaa. Sulisitsisut Naalakkersuisut corona pillugu killilersuinerat kingulleq pillugu siusinnerusukkut isornartorsiuingaatsiarnikuupput, taakkununngalu ilusilersueqataasimasariaqarsorigaluarput.

AAMMA ATUARUK Sulisitsisut Namminersorlutik Oqartussat isornartorsioraat: Corona pillugu malittarisassat tunngavilersugaalluanngillat

Killilersuinerit kattuffiup ilaasortaata akornanni akiliisinnaajunnaartoqarnerani, taakkulu sulisuminnik soraarsitsisariaqarneratigut suliffissaaleqisoqarnerulerneranik kinguneqarsinnaavoq. Tamannalu ikiorsiissutinut sivitsuisariaqartitsilersinnaavoq.

Sulisitsisut killilersuinermi naapertuuttunik tunngavilersuilluni eqqarsaataaseqarnermik takunnissinnaannginnerannut amerlanerpaat aaqqissuussinernut peqataajartorlutik,  kommuninut allanut angalanissaasa inerteqqutaaneranni politikerit namminersortullu ilaat inerteqquteqarnermut ilaatinneqannginnerat pitsaanerulersitsinngilaq.

- Peqqissutsimik politikkikkulluunniit suliaqarnermi isumaqaraanni kommunit akornanni nammineq angalasoqarsinnaasoq politikkikkullu ataatsimiinnerit ilaat ingerlanneqarsinnaasut taava pikkorissartitsinerit, ataatsimiinnerit isumasioqatigiinnerillu aaqqissuunnissaat aamma ajornassanngitsoq innersuussutigissagaluarparput, Brian Buus Pedersen oqarpoq.