KNAPK-ip umiarsualivinnut akiliisitsisoqartalernissaa nangaassutigigaa
Siulittaasoq naapertorlugu, atuisunik akiliisitsisarneq pillugu misilittakkat pitsaanerpaanngillat.
- Misilittakkagut tunngavigalugit ilaatigut politikkikkut aalajangiiginnarluni akiliutinik eqqussisarneq, immaqalu ilaatigut annertuallaartumik allaffissornikkut ilusilersorneqarsimasut, taakku maannakkut misilittagaqarfiginerluppagut, Henrik Sandgreen oqarpoq.
Naalakkersuisut umiarsualivinnik taakkualu nunami atortulersuutaannik atuinermut akiliuteqartarnermik Inatsisartunit 2015-imi pisinnaatinneqalerput.
Pisortat illoqarfinni annerni umiarsualiviutaanni atuisunik akiliisitsisalernissamut maanna misissuisoqartoq, aningaaqarnikkut ingerlatsineq pillugu 2020-mi nalunaarummi allaqqavoq.
AAMMA ATUARUK Umiarsualivinni annerni atuisunut akiliisitsisalernissaq misissorneqartoq
Nuup umiarsualiviani ingerlatseqatigiiffimmit SIKUKI Nuuk Harbourimit ingerlanneqartumi atuisunik akiliisitsisoqartareerpoq. Tassanilu misilittakkat Henrik Sandgreenip innersuussutigai.
- Ilaatigut ataasiakkaat akiligassarpassuarnik akiligassaqalertarput. Taannalu suliakkersuutaavoq annertooq.
Illoqarfinni annerni umiarsualiviit angingaasaleeqqinnernut namminneerlutik akissaqarnissaat, taamaasillunilu aningaasat aningaasanut inatsisitigut immikkoortinneqartartut umiarsualivinnut minnerni nutarterinernut atorneqarsinnaalernissaat atuisunik akiliisitsisarnissami siunertarineqarpoq.
AAMMA ATUARUK Umiarsualivinnik atuisut akiliuteqartalissagunarput
Aningaasanut inatsisitigut 25,2 millionit koruunit immikkoortinneqartartut taamaallaat aserfallatsaaliuinernut pisariaqavissunut naammattartut, nalunaarummi allaqqavoq.
KNAPK-miillu atuisunik akiliisitsinermut misilittagaqarfiginngikkaluarlugit umiarsualiviit pitsaanerunissaat kissaatigaat.
Atuisullu akiliisinneqartalissappata, maanna akiliisitsisarnermut aaqqissuussamit allaanerusariaqartoq, atuisunillu qanimut suleqateqartoqartariaqartoq, Henrik Sandgreen isumaqarpoq.
AAMMA ATUARUK Umiarsuit nutaat Sikuki Harbourilu RAL-imut unammillernarput
- Atuisut namminneerlutik peqataaffigisinnaasaannik aaqqissuussineq pingaaruteqarluinnaqqissaarpoq. Peqataaffigisinnaanngisaannik aaqqissuussinerit suulluunniit iluatsinngitsut maannakkut amerlavallaaqaat,
KNAPK-p siulittaasua, Henrik Sandgreen, taama oqarpoq.
Umiarsualivinnik aserfallatsaaliuinermut kinguaattoorutit 84 millionit koruunit missaanniittut 2015-imi missiliorneqarpoq.