Umiarsualivinni annerni atuisunut akiliisitsisalernissaq misissorneqartoq

Umiarsualivinni annerni atuisunut akiliisitsisalernissaq taakkunani aningaasartuutinut matussusiisinnaassaaq, taavalu umiarsualivinnut minnernut nutarterinissamut akissaqartoqalerluni. Naalakkersuisut taama isumaqarput.
Umiarsualiviit akiliiffiusalerunik aningaasartuutit matussusersinnaavaat, aningaasanullu inatsisitigut immikkoortinneqartartut umiarsualivinnut minnernut atorneqarsinnaalissallutik. Aningaasaqarnikkut ingerlatsineq pillugu 2020-mut nalunaarummi taama allaqqavoq
Allattoq Ivik Kristiansen
juunip 12-at 2020 12:08

Naalakkersuisut umiarsualivinni annerni atuisunik akiliisitsisalernissaq pillugu misissuipput.

- Illoqarfinni anginerusuni atuisunik akiliisitsisalernissamut periarfissat maanna misissorneqarput, aningaasaqarnikkut ingerlatsineq pillugu 2020-mut nalunaarummi allaqqavoq.

Umiarsualivinnut aningaasaleeqqinnernut ukiumut 25,2 millionit koruunit aningaasanut inatsisitigut maanna immikkoortinneqartarput.

Nunatsinnili pitsaasunik umiarsualiveqassappat taakku naammanngillat.

AAMMA ATUARUK Umiarsualivinnik atuisut akiliuteqartalissagunarput

- Taakku iluarsartuussinernut pisariaqarnerpaaginnarnut naammapput, taamaalillutillu umiarsualivinni atortuutit pitsanngorsarnerannut annikitsuinnarmik atorsinnaallutik, nalunaarummi allaqqavoq.

Umiarsualivippassuit annertuutigut meeqqanut, utoqqarnut pitsorluttunullu naleqqutinngitsut, taavalu umiarsualivippassuit aalisakkanik tunisinissamut, angallatinik pitussinissamut usinillu assartuinermut pitsaanngitsumik atugassaqartoq, nalunaarummi allaqqavoq.

Umiarsualiviit minnerit aningaasaliiffigineqarnerusinnaalissasut

Tamannalu illoqarfinni annerni umiarsualivinni atuisunik akiliisitsinikkut aaqqiivigineqarsinnaasoq, nalunaarummi allaqqavoq.

Umiarsualiviit akiliiffiusalerunik ingerlanneqarnerannut iluarsartuunneqartarnerannullu aningaasartuutit matussusersinnaavaat, namminnerlu aningaasaleeqqissinnaalissallutik.

Taamaattoqassappat, aningaasanut inatsisitigut immikkoortinneqartartut umiarsualivinnut minnernut aningaasaleeqqinnernut iluarsartuussineruullu atorneqarsinnaalissapput.

- Taamaalilluni umiarsualivinni annerusuni, kiisalu nunatsinni umiarsualivinni minnerusuni umiarsualivinni atortuutit pitsanngorsarneqarsinnaanerat akissaqartinneqalissasoq siunertarineqarpoq, aningaasaqarnikkut ingerlatsineq pillugu 2020-mut nalunaarummi allaqqavoq.

AAMMA ATUARUK Vanskelig klatretur for fiskere

Atuisut qanoq akiliitigisarnissaat eqqarsaatigineqarnersoq umiarsualiviillu sorliit pineqarnersut nalunaarummi annerusumik nassuiarneqanngilaq. Kisianni umiarsualiviit pillugit inatsimmit Inatsisartunit 2015-imi akuersissutigineqartumit tunngavissinneqareersoq allaqqavoq.