Umiarsualivinnik atuisut akiliuteqartalissagunarput
Naalakkersuisut umiarsualiviit pillugit inatsimmut allannguutissatut siunnersuutaat Inatsisartuni ippassaq pingasunngornermi oqaluuserineqarpoq, oqallinnerullu paasinarsitippaa umiarsualivinnik ingerlatsinermi atuisut akiliuteqartalernissaat partiinit amerlanerussuteqartunit ammaffigineqartoq.
Siunnersuulli oqallisigineqarmat Siumup oqaaseqartitaata Anders Olsenip siunnersuut tamakkiisumik tapersersunngilaa:
- Namminersortut pisortallu umiarsualivinnik ingerlatsinermi akiliuteqartalernissaat Siumumit ilalernartinngilarput, Anders Olsen, Inatsisartut Sanaartornermut Ataatsimiititaliaanni aamma siulittaasuusoq, oqarpoq.
Atuisut akiliuteqartalernissaat pingaarnertut aningaasalersuisussatut inissinnissaat siunnersummi pineqartumi siunertaanngilaq, umiarsualiveqarfiilli Namminersorlutik Oqartussanit pigineqartut inuiaqatigiinni attaveqaateqarnermilu illoqarfinni nunaqarfinnilu pisariaqartitat siunissaq eqqarsaatigalugu qulakkeerneqarnissaat anguniagaalluni.
Ataatsimiititaliami suliassanngortillugu ingerlateqqippaat
Umiarsualivinnik atuisut akiliuteqartalernissaat pillugu siunnersuut Sanaartornermut Ataatsimiititaliami suliareqqinneqassaaq, atuisullu qanoq akiliuteqartigisassanersut suli ilisimaneqanngilaq. Naalakkersuisut kingusinnerusukkut tamanna aalajangiiffigiumaarpaat.
Umiarsualivimmi ataatsimi atuisut akiliuteqartalernissaat, umiarsualivinnilu allani akiliuteqartannginnissaat pillugu siunnersuut inuussutissarsiuteqartunit tamakkiisumik tapersersorneqarnavianngitsoq, inuussutissarsiuteqartut KNR-ip oqaloqatigisimasai oqarput.
Naallu taama oqartoqaraluartoq umiarsualivinnik minnernik allanik atuinermi akiliuteqartoqalernissaq eqqunneqaratarsinnaasoq aamma oqaatigineqarpoq.
