Aalisartut ikiorsiissutinut utaqqikatattut

Nualluutip coronap ajornartorsiortitsinerani takornarialerisut aningaasatigut ikiorserneqarput, aalisartut aamma piaartumik ikiorserneqarusupput.

- Ikiorsiissutit Qeqertarsuarmi aalisartunut pisarialerujuupput, saarulliit akii apparnikupput taavalu coronap suna tamaat killilernikuullugu, aalisarneq Qeqertarsuarmi ingerlanerluttorujuuvoq, APPQ-mi siulittaasoq, Johannes Mølgaard, KNR-imut oqarpoq.

KNAPK, Sulisitsisut Naalakkersuisullu aalisartunut ikiorsiissutissanik misissuiniarlutik suleqatigiissitamik juulip aallartinnerani pilersitsipput. KNAPK-p siulittaasuata ikiorsiissutit qanoq ittuunissaat, aggustip qaammataata qiteqqunnerani ersarinnerulernissaat neriuutigaa.

- Aalisartut qanoq ittumik ikiorsissuteqartoqassasoq, una qaammat qiteqqutsinnagu paasisaqarnissaat neriuutigilluinnarpara, Henrik Sandgreen oqarpoq.

Utaqqisinnaanngitsut

Qeqertarsuarmiulli utaqqisinnaanngillat, taakkua aasaq manna agguaqatigiissillugit isertitaat, siorna aasaaneranut sanilliullugit pingasorarterutaasa missaanniilersimasut, APPQ-mi siulittaasoq oqaluttuarpoq.

- Aalisartut taamarsuaq utaqqisinnaanngillat, ukua allat takornarialerisunaasiit kisimik pineqalerput taperserneqarlutik, aalisartut minnerutitaanialerpunaasiit, aalisartut aamma pisariaqartitsipput ikiorserneqarnissaminnut, Johannes Mølgaard oqarpoq.

AAMMA ATUARUK Aalisartunut ikiorsiissutit misissorneqartut

Taassuma angallataatiliinnaat ikiorserneqassanngitsut, umiatsiaararsortulli aamma ikiorserneqassasut kissaatigaa.

Sulisitsisut suleqatigiissitap suliaata killiffia pillugu oqaaseqarusunngillat, aningaasaqarnermullu naalakkersuisoqarfik innersuussutigalugu. Taakkua suleqatigiissitami ataqatigiissaarisuupput.

Naalakkersuisoqarfilli KNR-imiit saaffiginnissummut suli akissuteqanngillat.