KNAPK: Narsami borgmesterip pisuutitsinera ilumuunngilaq

KNAPK-mit nalunaarutigissavarput Narsap borgmesteriata ippassaq radioavisimi oqaatigisai ilumuunngimmata. KNAPK-mit erseqqissaatigissavarput aalisartortatsinnut atugassarititaasut ajorsinissaannik maani suliaqannginnatta, akerlianilli kattuffiup aalisartut piniartullu suleqatigalugit pitsanngorsaatissanik anguniagaqartuaratta. KNAPK-p siulittaasua Peter Olsen Narsami borgmesterip Kiista B. Isaksen-ip Narsami raajaleriffip matuneqarnissaanut KNAPK akisussaaqataanerarlugu oqaaseqarneranut akissuteqarluni taama allappoq.

Aallakaatissiami Itisiliinermi sisamanngormat aallakaatinneqartumi, KNAPK-p siulittaasua Peter Olsen oqarpoq raajanik tunisassiorfinnik matusinissaq akuersaarsinnaanngikkini. Taamaakkaluartorli Royal Greenlandip KNAPK-llu raajarniat illoqarfinni raajanik tunisassiornermut unititsiffiusuneersut, kilomut immikkut 1 kronemik ukiuni sisamani immikkut tapiiffigineqarnissaat isumaqatigiissutigisimagaat Kiista B. Isaksen uparuaavoq.

Narsap borgmesteria isumaqarnerarpoq taamaasilluni raajaleriffinnik matusisoqarsinnaanissaa KNAPK-mit atsioqataaffigineqarsimasoq, taamaattumillu eqqortumik oqaluttoqartariaqalersoq Kista B. Isaksen uparuaavoq.

- Erseqqissaatigissavarput Royal Greenlandip Narsami raajaleriffiup atorunnaarsinnissaa eqqartulermagu allaffiginikuugatsigit tamanna KNAPK-mit akerlilerluinnaripput, Peter Olsen Kiista B. Isaksen-imut akissuteqarluni allappoq.

Peter Olsenip assersuutiga Aasiaat raajaleriffiat matunialermat KNAPK-p aamma akerliusimanera.

- Tassami tunngavigilluinnarparput aalisartortatta tunitsivissatigut atugaasa qulakkeerneqarnissaat soqutiguilluinnaratsigu, Peter Olsen allappoq.

Raajaleriffinnik matusisarnermut KNAPK-p akisussaasuunnginnera aamma erseqqissaatigaa.

- Royal Greenlandip tunitsivinnik naleqqussaaniarnera KNAPK-p akisussaaffiginngilaa, piginnittulli peqatigalugit tamanna Royal Greenlandimit aalajangerneqartarpoq, taamaattumik Narsap borgmesteriata KNAPK-mik pisuutitsiniarnera kusananngilaq, eqqortuunanilu, Peter Olsen taama erseqqissaateqarluni allappoq.