Klubbit pissartanngorniuttoqannginnissaa uggorigaat: Asuliinnaq unammillissuteqarpugut
Klubbip Ilulissaneersup angutit isikkamik arsaallutik pissartanngorniunnissaat aggustip qulinganni aallartittussaagaluartoq aaqqissuuttussaagaluarpaa. Pissartanngorniunnissarli piviusunngulinngitsoq aaqqissuussisussat ippassaq uppernarsivaat.
Isikkamimmi arsaannermi pissartanngorniunnissaq allanngortitassaanngitsumik taamaatinneqartoq KAK-p nalunaarutigaa.
AAMMA ATUARUK KAK: Isikkamik arsaannermi pissartanngorniuttoqarnissaa taamaatinneqarpoq
- Pissutsit oqaluuserivagut uggoringaatsiarparpullu. Aappaagu aaqqissuussisinnaanissarput neriuutigaarput, Nagdlúnguup siulittaasua, Lena Ravn Davidsen , KNR-imut mailikkut akissuteqarluni allappoq.
Malittarisassat allanngortinneqarsinnaanngitsut
Katerisimaarnermut malittarisassat
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Naalakkersuisut corona pillugu aqutsisoqarfiullu arsartartut kattuffiata isikkamik arsaannermi pissartanngorniuttoqarnissaanut qinnuteqarnera itigartitsissutigaat.
Kalaallit Arsartartut Kattuffiata, KAK-p siulittaasuata, Finn Meinelip tamanna oqaatigaa.
Taassuma Namminersorlutik Oqartussat Corona pillugu aqutsisoqatigiillu pissartanngorniunnerit qanoq aaqqissuunneqarsinnaaneranut siunnersuuteqarfiusumik sapaatip akunnerata naanerani ataatsimeeqatigai.
Siunnersuutilli itigartitsissutigineqarput. Coronami pillugu malittarisassat pissartanngorniuttoqarnissaanut aporfiusut allanngortinneqarsinnaanngillat.
KAK-p misiliinera qujassuteqarfigiaat
Unammisaqattaarnissamut holdit katillugit arfineq-pingasut angussimagaluarput, arsaattartulli sungiusaasullu aallartussaajunnaarput.
- Iliuuserisinnaasavut sinnerlugit iliuuseqarpugut. Aamma KAK taamaaliorpoq. Aalajangiineq akueriniassavarput, nunatsinnilu isikkamik arsaattartut arsaannermut soqutiginnikkunnaannginnissaat neriuutigaarput, Lena Ravn mailimi allappoq.
AAMMA ATUARUK Arsartartoq pissartanngorniunnissat taamaatinneqarnerat pillugu: Mamaatsoornaq
- KAK ullut tamangajaasa oqaloqatigisarparput Naalakkersuisunullu sukataarnerat malinnaaffigalugu. Unammisartut pillugit qasusuillutik sukataaruteqarnerat pillugu qujassuteqarfigaagut. Maanna siunissaq alloriarnissallu tullia pillugu oqaloqatigiissaagut.
Anngunniarnermi piffissaq suliffiusinnaasoq annaaneqartoq
Isikkamik arsaattartut Kangaatsiameersut FC Aqissip taamaatitsisoqarnera aamma akueriuminaatsippaat.
Taakku nunatsinni pissartanngorniunnissamut nunatta avannaani pissartanngorniunnermi anngunniarlutik sukataarsimapput.
- Soorunalimi anguniagaqarnikuulluni taassuma tungaanut piffissarujussuaq atornikuullugu unitsinneqarnera akueriuminaatsorujussuuvoq, Lars Lundblad Iversen oqarpoq.
- Piffissaq atorsimasarput tamatta ataasiakkaatut annaasaqarfiginikuuarput. Ilaat sulisartuupput, ilaat aalisartuupput, taava taanna piffissaq atornikuuarput immaqa nalunngittumik tamatta asuliinnaanngitsoq.
AAMMA ATUARUK Erik pissartanngorniuunnissaq pillugu: Timersornermut aporfiusut – piaartumik – unitsinneqarlik
Taassuma Naalakkersuisut coronap ilungersunartorsiortitsinerani nunatsinni ammaajartornerulernikuuneranni sooq aaqqiissuteqartoqarsinnaannginnera paasiuminaatsippaa.
- Uani isumaqarpoq inuiaqatigiinnut tunulliussinerujussuaq. Nunanut allanut ammaassipput, kisianni inuiaqatigiinnut mattussillutik, Lars Lundblad Iversen oqarpoq.
Inunnut timersornermullu tatiginninnermik takutitsisoqarli
Nunatta avannaani holdinit allani FC Malamuk Uummannameersunut siulittaasoq aamma pakatsivoq.
Johannes Mathiassenip holdimik 1979-imi pilersitseqataasup Naalakkersuisut timersornermik aaqqissuussisoqarnissaanut tatiginninnermik takutitsinissaat kaammattuutigaa.
- Ataatsimut isigalugu uanga nammineq isumannik ukiorpassuarni timersornermut malinnaasimasumit pisinnaasimagaluarpoq, inuiaqatigiit tatigigutta aamma politikkikkut ullumikkut ingerlatsinermi aalajangernerit akuleruffiginngikkaluarlugit sukangavallaartutut isigivakka, inuiaqatigiit tatiginninnermik tunilaarsimasariaqaraluarpaat.
