KAK: Isikkamik arsaannermi pissartanngorniuttoqarnissaa taamaatinneqarpoq
Nunatsinni isikkamik arsaannermi ukioq manna pissartanngorniuuttoqassanngilaq.
Kalaallit Arsaattartut Kattuffiat Facebookikkut quppernermini ippassaq unnukkut nalunaaruteqarpoq.
Isikkamik arsarnermi unammeqattaarnerit Ilulissani aggustip ulluisa qulingannit aaqqissuunneqartussaagaluarput, sapaatillu akunnerata ataatsip qaangiunnerani arnat Nuummi pissartanngorniuuttussaagaluarlutik.
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Coronali pillugu malittarisassat pissartanngorniuunnernik aaqqissuussinissamut pilersaarusiornermut aporfiliingaatsiarput. Namminersorlutik Oqartussaniimmi nalunaarut nutaaq naapertorlugu kommunimiit kommunimut allamut angalalluni aaqqissuussinernut peqataanissamik nalunaarfigineqartussanut angalasoqaqqusaanngilaq.
Arsartartut Kattuffiata Namminersorlutik Oqartussat sapaatip-akunnerata naanerani ataatsimeeqatigaat. Tamatumali saniatigut KAK-p oqarnera naapertorlugu suliaq pillugu oqaloqatigiissuteqartoqarpallaarsimanani.
AAMMA ATUARUK KAK-p isikkamik arsaannermi pissartanngorniunnissat kinguartikkai
KAK-mit ippassaq unnukkut nalunaarut saqqummiunneqarpoq:
Nunatsinni pissartanngorniunnerit ukioq manna aaqqissuunnissaannut Namminersorlutik Oqartussanit akuerineqanngitsut kattuffik Facebookikkut allappoq.
KNR-ip peqqissutsimut naalakkersuisoq, Anna Wangenheim (D) sisamanngormalli oqaaseqartinniarsarigaluarpaa – iluatsinngitsumilli.
Isikkamik arsannermi pissartanngorniunnerit aaqqissuunneqarnissaat qularnanngitsoq ippassaq erseqqissumik saqqummiunneqarpoq. Corona pillugu aqutsisoqatigiit pissartanngorniunnissamut tunngatillugu tuniluuttoqaratarsinnaaneranut aarlerinarnera annertuallaartoq KNR-imut allappaa.
- Isikkamik arsaannermi pissartanngorniuttoqarnissaanut atatillugu peqqissutsimut suliaqartut nalilerpaat aaqqissuussinerni annertuuni taamaattuni tuniluuttoratarnissaa aarlerinaateqarpallaarpoq, corona pillugu aqutsisoqatigiit KNR-imut mailikkut allapput.
Nunatsinni inuit sumiiffinnit assigiinngitsuneersut katersuutseriarlugit piffissap sivikitsup ingerlanerani angerlaqqinnissaanni immikkut ittumik aarlerinaateqartoq aqutsisoqatigiit aamma nalilerpaat.
