Erik pissartanngorniuunnissaq pillugu: Timersornermut aporfiusut – piaartumik – unitsinneqarlik
- Maannakkut iliuuseqartoqarluni arlaatigut aaqqiissuteqartoqartariaqarpoq. Klubbit unammiuaarnernik aaqqissuussinissaannut akisuallaalinnginneranni iliuuseqartoqartariaqarpoq, angalanermini aningaasartuutit akisungaatsiarput.
Siumumit Inatsisartunut ilaasortaq, Erik Jensen oqarpoq. Taanna Inatsisartuni ilaqutariit peqqinnissarlu pillugit ataatsimiititaliami aamma ilaasortaavoq.
Tamatuma saniatigut Sisimiuni timersortartut klubbianni SAK-mi sungiusaasuuvoq. Taassumali sungiusartagai nunatsinni isikkammik arsaannermi pissartanngorniuunnissamut anngussimanngillat.
AAMMA ATUARUK Nivi Olsen pissartanngorniunnissap nalornissutigineqarnera pillugu: Arsaannermik aallartitseqqissaagut
Katerisimaarnermut malittarisassat
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Qanoq qanorlu amerlatigisut katersuussinnaanissaanut malittarisassat ukiup naanissaanut sivitsorneqartut Naalakkersuisut sapaatip-akunnerata siuliani nalunaarutigaat. Taamaammat nunatsinni kommunit killeqarfiisa avataannut unammiartornissat periarfissaarpasinnatik.
Angutit Ilulissani pissartanngorniullutik aggustip ulluisa qulinganni aallartitussaagaluarput, arnallu Nuummi tamatuma kingorna sapaatit akunnerata qaangiunnerani aallartittumik pissartanngorniuttussaagaluarlutik.
Tamatuma kingorna Kalaallit Arsaattartut Kattuffiata, KAK-p Naalakkersuisut maleruaqqusanik atsiunnginnerminni kattuffimmut tusarniaasimannginnerat isornartorsiungaatsiarpaa. tusarniarneqarsimannginnera pakatsissutigaa
Isikkammik arsaannermut kisimi tunnganngitsoq
Erik Jensen (S) nunatsinni isikkammik arsaattoqarnissaanik aallartitsisoqarnissaanik kissaateqartut tulleraat. Isikkammilliu arsaannermut kisimi tunnganani timersornernut pissartanngorniuunnernullu tamanut tunngavoq:
- Naalakkersuisut illoqarfinni assigiinngitsuni unammiuaartoqarnissaanut ajoqutaasunik aporfiusunillu piiaanissaannik kaammattuuteqarfiginiarpakka, Erik Jensen oqarpoq.
- Akisuallaalinnginnerani klubbillu aaqqissuussani assigiinngitsuni peqataanissaasa akitsunnginneranni iliuuseqassaagut.
AAMMA ATUARUK Kattuffik pakatsisoq: Maleruaqqusat allanngortinnissaanut sunniuteqarsinnaasimanngilagut
Naalakkersuisut siulittaasuata, Kim Kielsenip nunatta ammariaqqikkiartuaarneranut immikkoortup tullia sapaatip-akunnerata siuliani saqqummiuppaa.
Illut iluani katerinnermi inuit amerlanerpaamik 100-nissaannut - silamilu amerlanerpaamik 250-nissaannut piumasaqaatit suli atuupput
- Piumasaqaatillu taakkua EQQUUTITINNEQASSAPPUT, Bjørn Tegner Bay tusagassiortunik katersortitsinermi oqarpoq.
Timersortartullu malittarisassanik attaqqinninnissaat Erik Jensenip qularutiginngilaa:
- Timersortartut peqatigiiffiisa malittarisassat malissagaat, imminnut ungasillisimaassasut imminnullu paarissasut qularutiginngilara.