Nivi Olsen pissartanngorniunnissap nalornissutigineqarnera pillugu: Arsaannermik aallartitseqqissaagut
Demokraatit maajip qaammataata naanerani Naalakkersuisooqataalerput.
Anna Wangenheim peqqinnissamut naalakkersuisunngorpoq, timersortartoq, Jens Frederik Nielsen inuussutissaqarnermut aatsisatassaqarnermut naalakkersuisunngorpoq, Steen Lyngelu nunanut allanut tunngasunut nukissiuuteqarnermullu naalakkersuisunngorluni.
Demokraatiniilli Anna Wangenheim peqqinnissamut naalakkersuisuusoq nunatsinni isikkammik arsaannermi pissartanngorniuuttoqarnissaaa pillugu suliaq tamaat nipaattorujussuuvoq.
AAMMA ATUARUK Pissartanngorniuuttoqassava? Tamanna ilisimaneqanngilaq - holdilli arfineq-pingasut piareerput
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Nunatsinni isikkammik arsaannermi pissartanngorniuunneq Ilulissani qaammatip tulliani ingerlanneqartussaagaluarpoq, coronali pillugu malittarisassat sukannersut pissutigalugit tamatuma piviusunngornissaa qularnarpoq.
Maanna demokraatini siulittaasorigallarsimasaat, Nivi Olsen nammineq partiiminut naalakkersuisunngortitseqataaffiminut isornartorsiuteqarpoq.
- Nunatsinni corona qujanartumik atuutinngilaq. Nunani allani corona atuukkaluartoq arsaannerit ingerlapput. Soorunami mianersortumik maleruagassanullu ataqqinnittumik.
- Taamaattumik aamma uangut Nunatsinni pissartanngorniutivinnerit soorunami ingerlassinnaavagut, Nivi Olsen tusagassiuutinut nalunaarummi allappoq.
Naalakkersuisut siulittaasuata, Kim Kielsenip nunatta ammariaqqikkiartuaarneranut immikkoortup tullia sapaatip-akunnerata siuliani saqqummiuppaa.
Illut iluani katerinnermi inuit amerlanerpaamik 100-nissaannut - silamilu amerlanerpaamik 250-nissaannut piumasaqaatit suli atuupput
- Piumasaqaatillu taakkua EQQUUTITINNEQASSAPPUT, Bjørn Tegner Bay tusagassiortunik katersortitsinermi oqarpoq.
Timersorneq aamma aammassiffigineqassasoq
Isikkammik arsaattoqarnerani maleruaqqusat aamma malinneqarsinnaasut, Nivi Olsen isumaqarpoq.
- Nunarput ammaraluttuinnarpoq, tupinnassoorlu ammaraluttuinnaatigalugu nunap inuiisa peqqinnartumik timersornikkut ingerlatsinerat killilersorniarsarissagutsigu, Nivi Olsen oqarpoq.
- Arsartartorpassuit piareersarluarnikut pissamaaqisullu nalornisinneqarnerat akuerisinnaanngilara. Timersorneq illersorpara, politikereqatikkalu susassaqartullu tamaasa kaammattorpakka piaartumik ersarittumik nalunaaruteqartoqarnissaa.
AAMMA ATUARUK Kattuffik pakatsisoq: Maleruaqqusat allanngortinnissaanut sunniuteqarsinnaasimanngilagut
Qanoq qanorlu amerlatigisut katersuussinnaanissaanut malittarisassat ukiup naanissaanut sivitsorneqartut Naalakkersuisut sapaatip-akunnerata siuliani nalunaarutigaat. Taamaammat nunatsinni kommunit killeqarfiisa avataannut unammiartornissat periarfissaarpasinnatik.
Angutit Ilulissani pissartanngorniullutik aggustip ulluisa qulinganni aallartitussaagaluarput, arnallu Nuummi tamatuma kingorna sapaatit akunnerata qaangiunnerani aallartittumik pissartanngorniuttussaagaluarlutik.
KAK paatsuungasoq
Finn Meinelilli KAK-p maleruaqqusanik sivitsuinnginnermi tusarniarneqarsimannginnera pakatsissutigaa
- Maleruaqqusat decembarip 31-ata tungaanut sivitsorneqarnissaannut tunngatillugu aperineqanngilagut, tamannalu pillugu tusarniaavigineqanngiivilluta aalajangiisoqariasaarpoq, Meinel oqarpoq itisiliillunilu:
- Isumaqarpugut suleqataajumasimagaluarluta, maleruaqqusallu sivitsorneqarnissaannut nalilersuinermi nunatsinni timersorneq eqqarsaatigalugu peqataatinneqannginnerput pakatsissutigaara, KAK-lu kisimi eqqugaanngilaq. Tamanna isikkamik arsaattartunut taamaallaat ajornartorsiutitsinani timersortartut allat aamma eqqugaapput.
