KAK-p corona pillugu allattoqarfik arlaleriarluni ataatsimeeqatiserisarsimavaa, allattoqarfiulli KAK ataatsimeeqatigiumasimanngikkaa, Finn Meinel oqarpoq.Assi: KNR

Kattuffik pakatsisoq: Maleruaqqusat allanngortinnissaanut sunniuteqarsinnaasimanngilagut

Kalaallit Arsaattartut Kattuffiata maleruaqqusanik sivitsuisoqannginnerani tusarniaavigineqarsimannginnini pakatsissutigaa.

Angutit pissartanngorniutivinnissaasa qaammatip tulliani aallartinnissaat pilersaarutaagaluarpoq.

Coronali peqqutigalugu katersuussinnaanermut maleruaqqusat Namminersorlutik Oqartussanit sivitsorneqartamata, pilersaarutit allanngorput.

Finn Meinelilli KAK-p maleruaqqusanik sivitsuinnginnermi tusarniarneqarsimannginnera pakatsissutigaa.

- Maleruaqqusat decembarip 31-ata tungaanut sivitsorneqarnissaannut tunngatillugu aperineqanngilagut, tamannalu pillugu tusarniaavigineqanngiivilluta aalajangiisoqariasaarpoq, Meinel oqarpoq itisiliillunilu:

- Isumaqarpugut suleqataajumasimagaluarluta, maleruaqqusallu sivitsorneqarnissaannut nalilersuinermi nunatsinni timersorneq eqqarsaatigalugu peqataatinneqannginnerput pakatsissutigaara, KAK-lu kisimi eqqugaanngilaq. Tamanna isikkamik arsaattartunut taamaallaat ajornartorsiutitsinani timersortartut allat aamma eqqugaapput.

Emaileqatigiinneq ataatsimeeqatigiinnertaqanngitsoq

KAK-p corona pillugu allattoqarfik arlaleriarluni ataatsimeeqatiserisarsimavaa, allattoqarfiulli KAK ataatsimeeqatigiumasimanngikkaa, Finn Meinel oqarpoq. Emailikkut attaveqatigiinnerat aamma kipiluttunarsimavoq, tamannalu naammaginanngitsoq KAK-p siulittaasua isumaqarpoq.

- Aaqqiissutissanik eqqartueqatigiinnissarput siunertaralugu ataatsimeeqatigerusussimagaluarpavut. GM-ertoqarnissaanummi aaqqissuusseqqinnissamut siunnersuutissatsialassaqaraluaratta, taanna oqarpoq.

Angutit Ilulissani pissartanngorniullutik aggustip ulluisa qulinganni aallartitussaagaluarput, arnallu Nuummi tamatuma kingorna sapaatit akunnerata qaangiunnerani aallartittumik pissartanngorniuttussaagaluarlutik.

Inuit peqqissuunissaat eqqarsaatigalugu nutaamik aaqqissuussinikkut pissartanngorniuttoqarsinnaagaluarpoq. Assersuutigalugu illoqarfimmi ataatsimi katersuutinngikkaluarlutik illoqarfinni ataasiakkaani pissartanngorniuuttoqarsinnaagaluartoq, Finn meinel oqarpoq.

- Timersornerup unittuunnginnissaanut tulluussakkanik nutaanik maleruagassiortoqarsimannginnera paasisinnaanngilarput.

Coronap tunillaassuunnissaanik pinaveersaartitsisoqarnera paasisinnaalluarpara. isumaqarpungali tamakku tamaasa eqqarsaatigalugit aaqqiissuteqartoqarsimasinnaagaluartoq, taanna oqarpoq.

Pakatsineq

Holdit Ilulissani pissartanngorniutivinnissaraluamut annguttut arfineq-pingasuupput, IT-79-ilu Nuummeersut taakku ilagaat.

Peri Fleisherip IT-79-imeersup pissartanngorniunnissaraluap taamaatinneqarnera pakatsissutigaa.

- Soorunami unammisartutut tamanna pikkunaatsoornarpoq. GM-i uagutsinnut arsaattartuusunut pingaarnerpaagami, taavalu piffissap sivikitsuinnaap ingerlanerani silamiittarluta. Uagullu unammisartuusugut tamanna pingaartittaqalutigu.

KNR-ip Naalakkersuisut oqaaseqartinniarsimagaluarpaat iluatsinnaguli.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat