Arsartartoq pissartanngorniunnissat taamaatinneqarnerat pillugu: Mamaatsoornaq
- Piareersimavugut erinisoqaagut. Kisianni taamatut holditut nalunaarfigitinneq mamaappoq.
Isikkamik arsartartunit, IT-79 Nuummeersuni unammisartoq, Laakki Broberg Egede oqarpoq.
Nunatsinni pissartanngorniunnerit siorna Nuummi aaqqissuunneqarmata arnat pissartanngorniuttussat ikittuarannguupput. Holdinit peqataaniarlutik nalunaarsimasunit holdit tallimat pissartanngorniunnissamut peqataaniarunnaarlutik nalunaarput.
Ukioq mannali holdit arfineq-pingasut piareersimagaluarput arsaassutitillu ukioq manna pissartanngorniunnissamut piareersimatillugit.
Tamanna Laakki Broberg Egedep arsartartoqataasalu qilanaarutigingaatsiarsimagaluarpaat.
- Sivisoorujussuarmik iluamik arnanik pissartanngorniuttoqarnikuunngilaq. Massakkullu holdit arfineq-pingasut peqataasinnaasutut nalunaarnikuupput, iluatinnaraluaqaaq taanna, taama amerlatigaluta GM angusinnaasuugutsigu, arsartartoq oqarpoq.
Katerisimaarnermut malittarisassat
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Malittarisassat allanngortinneqarsinnaanngitsut
Naalakkersuisut corona pillugu aqutsisoqarfiullu arsartartut kattuffiata isikkamik arsaannermi pissartanngorniuttoqarnissaanut qinnuteqarnera itigartitsissutigaat.
- Pissartanngorniuutoqarnissaata taamaatinneqarnissaanut aalajangiinngilagut, malittarisassat kingunerat akuerigalugu pissartanngorniunnerit aaqqissuunneqarsinnaanngitsut oqaatigaarput.
Kalaallit Arsartartut Kattuffiata, KAK-p siulittaasua, Finn Meinel oqarpoq.
Taassuma Namminersorlutik Oqartussat Corona pillugu aqutsisoqatigiillu pissartanngorniunnerit qanoq aaqqissuunneqarsinnaaneranut siunnersuuteqarfiusumik sapaatip akunnerata naanerani ataatsimeeqatigai.
Siunnersuutilli itigartitsissutigineqarput. Malittarisassammi allanngortinneqarsinnaanngillat.
Aaqqiissutaasinnaasut
Laakki Broberg Egedelli pissartanngorniuttoqarnissaata taamaatiinnarneqarneranut aalajangiinerup ilaa paasisinnaavaa, aaqqissuunneqarsimasinnaaneranullu aaqqiissutaasinnaasunut takorluuisinnaagaluarluni.
- Periarfissaasinnaagaluarpoq soorlu isiginnaartut killilersorsinnaallugu, iluaqutaasinnaagaluarpoq taamanna killilersuilaarluni toqqaannartumilluunniit aallakaatitsilluni, Laakki Broberg Egede oqarpoq.
Taassuma arsat arsartartut ukiuni kingullerni kinguariartortut nammineerluni malugisimavaa. Ukioq manna arnat isikkamik arsarnermik pissartanngorniunnerat ineriartortitseqqinnissamut immikkut ittumik periarfissaalluaraluartoq, Laakki Broberg Egede isumaqarpoq.
- Uggornarpoq, arnat siuarsarneqarnissaata pisariaqalerfiani taama nalaataqarnerput assut uggorivara.
- Soorlu una eqqarsaatigivara, timersorneq illukartinneqarluni imerniartarfiit ammatiinnarneqassappat. Peqqinnerulernissarlu eqqarsaatigineqarluni, imerniartarfinni iserunik anigunik taamaasiortut imminnut qanorsuaq attuuasinnaapput susinnaapput. Taava uagut tassaqaluunniit immitsinnut 5 minutsi attoqqassaagut annerpaamik, Laakki Broberg Egede oqarpoq.
KNR-ip Naalakkersuisut oqaaseqartinniarsarai.
