Meeqqat klamydiamik gonorémillu aamma tunillatsittartut
Meeqqat atoqateqarnissaminnut ukiukippallaartut tassa 15-it inorlugit ukiullit kinguaassiutitigut nappaatinik klamydiamik gonorémillu nunatsinni ukiut tamarluinnaasa tunillatsittarput. Kinguaassiutitigut naappaateqartut ukioq kingulleq paasineqartut 4445-upput taakkunanngalu 14-inik ukiullit ukiukinnerusulluunniit 62-iupput
Tunillanneqarsimasut ilaat ukiukitsunnguupput. Meeqqani nappaateqartunit 62-init arfineq-marluk tallimat qulingiluallu akornanni ukioqarput. Arfinillit klamydiamik nappaateqartut ataaserlu gonorémik nappaateqartoq naatsorsueqqissaarnerup takutippaa.
Meeqqani atoqateqarnissaminnut ukiukippallaartuni kinguaassiutitigut nappaatit ukiuni kingullerni nikippallaarsimanngillat. 2010-mi 69-it 2015-imilu 60-it gonorémik klamydiamillu nappaateqartut naatsorsorneqarsimapput.
Kinguaassititigut nappaatit tamanik eqquisarput
Naatsorsueqqissaarnerilli qimerlooraanni meeqqat nappaateqartut amerlanerpaanngillat. Nappaatinik syfilisimik, gonorémik klamydiamillu tunillatsissimasut akornanni inuusuttut 15-it 19-illu akornanni ukiullit amerlanerpaapput.
Gonoré atoqatigiinnikkut tunillaannerusarpoq, arnalli erninermini nappaateqarsimagunik meeqqamut aamma tunillaasinnaasarput. Meeqqat tunillanneqarsimasut katsorsarneqanngikkunik tappingissutaasinnaasumik isimikkut aseruuttuungaatsiarsinnaapput.
Klamydia atoqatigiinnikkut tunillaannerusarpoq. Arnalli klamydiamik tunillatsissimasut erninerminni meeqqamut tunillaasinnaapput. Meeqqat tunillatsissimasut isimikkut aseruuttoorneqartarput qaqutigoortunilu aamma pualluuteqarsinnaasarluni
Najoqqutaq: Netdoktor
Nappaatini naatsorsuiffigineqarsimasunit pingasoraarterutaat 15-it 19-illu akornanni ukiulinni amerlanerpaapput. Naatsorsueqqissaartarfimmi kisinneqarsimasuni 1387-ini taakku amerlanerpaallutik, 20-llu 24-llu akornanni ukiullit amerlanerpaat tulleraat.
Kisitsisilli alianartut aamma ajunngitsortaqarput.
Kinguaassiutitigummi nappaateqartutut naatsorsorneqarsimasut 1387-it ikileriarfiusimavoq. Tassami syfilisimik, klamydiamik gonorémillu nappaateqartartut 67-inik ikileriarsimapput.