Naalagaaffiup sinniisoqarfia naqissusiivoq: Tillie Martinussen attaviitsutut qineqqusaassaaq

Tillie Martinussen Suleqatigiissitsisuneersoq Folketingemut attaviitsutut qinigassanngortissalluni aallaqqaammut oqarpoq.

Taamali oqarsimatsiarluni imminut naqqippoq: Suleqatigiissitsisut tunuliaqutaralugit qinigassanngortissinnaalluni.

Tamannali aamma kukkunerusoq, Naalagaaffiup Kalaallit Nunaanni sinniisoqarfiani pisortap tullia, Morten Nornild KNR-mut oqarpoq. Tillie Martinussen attaviitsutut tassa partiimik tunuliaqutarani taamaallaat qinigassanngortissinnaavoq. Tamanna partiip Suleqatigiissitsisut Inatsisartuni sinniisuutitaarunnikuuneranik peqquteqarpoq.

Paatsiveerusimaarpit? taava ataaniittoq atuaruk.

Folketingemut Kalaallit Nunaannit qineqqusaassagaanni inatsit malillugu periarfissat marluinnaapput:

Partii Inatsisartunut ilaasortaatitalik tunuliaqutaralugu qinigassanngortissinnaavutit partiinulluunniit attuumassuteqarnak, attaviitsutut qineqqusaarsinnaavutit.  

- Parteeqarlutit parteeqarnalluunniit qinigassanngortissinnaavutit. Parteeqarluni qinigassanngortissagaanni partii Inatsisartuni sinniisuutitaqareersuusariaqarpoq. Taava Inatsisartunut sinniisuutitalinnik parteeqanngikkaanni tamatigorluinnaq parteeqarani qinigassanngortittoqassaaq, Morten Nornild oqarpoq.

Atsiornerit 100-t katersorneqassasut

Taamaattumik Tillie Martinussen attaviitsuuvoq. Novembarillu aallaqqaataani qinersinermi atini qinigassat akornanniissappat ulapputissaqarpoq. Taannami atsiornernik 100-nik katerseqqaartariaqarpoq. Tillie Martinussen qinigassat akornanniinnissaanut tapersersoraanni atsiortoqarsinnaavoq. Tassani inuup atsiortup aqqa, najugaa inuup-normualu allaqqassapput. Qinersinissamulli pappiaqqami Tillie Martinussenip aqqata nalaani "Suleqatigiissitsisut" takuneqarsinnaassanngilaq.  

Tillie Martinussen, sooruna Folketingemut qinigassanngortileravit inatsisit ilisimanngiligit?

- Siullertut, Folketingemut siornatigut qineqqusaarnikuunngilanga, Aamma maanna pisup assinganik siornatigut pisoqarnikuunngilaq. 

- Suleqatigiissitsisut Inatsisartunut ilaasortaatitaqanngillat. Taamaattumik danskit qinersinermut inatsisaat malillugu qinigassanngortittariaqarpunga. Partiima tamanna tamakkiisumik tapersersorpaa. 

- Sermitsiaq qinigassanngortinniarnersunga aperimmat paatsiveerusimaartoqalerpoq. Tamanna ullualunni eqqarsaatigaara qinigassanngortinniarlungalu aalajangerpunga.

AAMMA ATUARUK Ataatsimut isigalugu: Kalaallit qinigassanngortittut qineqqusaarutaallu aaku

- Taava KNR oqarmat attaviitsutut qineqqusaassasunga paatsiveerusimaartoqaqqilerpoq. Kisianni uanga oqarpunga parteera sinnerlugu qineqqusaassallunga Folketingemummi qinersinissami periarfissat taakku marluinnaapput.

- Inatsisartunut qineqqusaarnermi inatsisit atuuttut folketingimut aamma atuuttut aallaqqaammut isumaqaraluarpugut, Naalagaaffiullu sinniisoqarfianit akissutisinissamik utaqqilluta. Akissut kingusinaalaartumik takkuppoq paatsiveerusimaartoqalerporlu.

Folketingemut partiimit attaviitsutulluunniit qineqqusaarnissamut inatsisit paasiuminaassimaqippata taava qinersisigiumaakkavit Folketingemi politikkilissagaluaruit, paasissutissat eqqortut atorneritit tatigisinnaavaatsit? 

- Suliffeqarfimmut allanninni akissummillu utaqqininni tusagassiorfiit inatsisit paasinissaat pillugit sukkanerunerat suliffeqarfinnullu ajornannginnerusumik uatsinnit attaveqarsinnaaneranni tatiginnissapput. Akissummik utaqqisariaqarpugut taava akissut takkukkumaarpoq.  

- Isumaqarpunga pisoq annertuuliutigisariaqanngitsoq, taama oqartariaqarpunga. Folketingemut qinersinermi taaneqarsinnaavunga. Inuit nalunngilluarpaat Suleqatigiissitsisuneertunga taamaattumik isumaqanngilanga qassiiliuutissaasoq.

Atsiornerit ataasinngorpat naammatsissangavai

Tillie Martinussen atsiornernik 50-nik tallimanngornermi ullo-qeqqata siorna katersereerpoq. Taassuma atsiornerit katersani ataasinngorpat 100-nngornissaat ilimagaa.

Partiinit attaviitsutullu qinigassanngortittut qinigassanngortinnerminnik kingusinnerpaamik oktobarip 21-anni nalunaaqutaq 12.00 nalunaariissapput.  

Tamatuma kingorna Naalaagaaffiup sinniisoqarfiata qinigassanngortittut inatsisit malillugit qinigassanngortissinnaanersut misissussavaa.