Tillie Martinussen attaviitsutut Folketingimut qinigassanngortittoq
Suleqatigiissitsisuneersoq, Tillie Martinussen, partiini tunuliaqutarinagu attaviitsutulli Folketingimut qinigassanngortippoq.
- Coronamik tunillanneqarsimanera peqqutaalluinnarpoq, qinigassanngortitsisussarsiortussaallutalu. Taamaammat attaviitsutut qinigassanngortippugut, Tillie Martinussen oqarpoq.
Suleqatigiissitsisuniit Inatsisartuni ilaasortaqanngilaq.
Taamaammat Folketingimut qinigassanngortissinnaajumallutik attaviitsutut qinigassanngortittunit amerlanerusunik qinigassanngortitsisussarseqqaartariaqarput.
Qinigassanngortitsisussarsiornissaq angumerisinnaanngikkaat
Partiigisaq tunuliaqutaralugu attaviitsutut qinigassanngortinneq nalinginnaasuunngilaq. Suleqatigiissitsisulli parteertik tunuliaqutaralugu naammattunik piffissap taama sivikitsigisup ingerlanerani qinigassanngortitsisussarsisinnaanavianngitsut, Tillie Martinussen isumaqarpoq.
Attaviitsutut qinigassanngortinniarnermi partiimik tunuliaqutaqarluni qinigassanngortinniarnermisulli amerlatigisunik qinigassanngortitsisussarsisimasariaqanngilaq.
- Tassa 100-innarnik qinigassanngortitsisussarsisimasussaavugut. Qinersinermut inatsit naapertorlugu taamaappoq, ajoraluartumillu coronamik tunillagaagama nunarput tamakkerlugu qinigassanngortitsisussarsiornissatsinnut piffissaalatsivugut, Tillie Martinussen oqarpoq.
Danskit oqartussaasui suleqatiseriniaraat
Tillie Martinussenip utoqqaat inuillu ikiortariallit qineqqusaarutiginiarpai.
- Nunatsinni utoqqalinersiutit Danmarkimi, Sverigemi Norgemilu utoqqalinersiutitulli amerlatigilersillugit nalimmassarneqartariaqarput. Tamanna danskit oqartussaasuisa suleqatiginerisigut immaqa anguneqarsinnaavoq, taanna oqarpoq nangillunilu:
- Nunattalu inuisa akornanni napparsimasut tarnikkulluunniit nappaatillit Danmarkimut noorarnerat ingalassimaniarlugu Danmark aamma suleqatisererusupparput.
Nunatta Danmarkillu maanna suleqatigiinnerat pitsaanerusariaqartoq, Tillie Martinussen aamma isumaqarpoq.
- Partiitoqqat namminersulivinnissamik oqallisiginnittuartut namminersulivinnissatsinnut qanoq aningaasalersuiniarnersut tusarusunnarpoq, Tillie Martinussen oqarpoq.
