Tillie Martinussen kukkusoq - partii tunuliaqutaralugu qineqqusaarsinnaasoq

Ullualunnguit qaangiupput Tillie Martinussen KNR-imut oqaatigimmagu Suleqatigiissitsisut tunuliaqutaralugit Folketingimut qineqqusaarsinnaanani pissutigalugu partiip qinigassanngortitsisussarsiornissaq angumerisinnaanngimmagu.

Taamaammat attaviitsutut qinigassanngortikkusussimavoq, taamaaliorneq 100-nnarnik qinigassanngortitsisussarsisimaneq piumasaqaataammat. Tassa imatut paasillugu, qinigassanngortikkumallugu atsiornikkut qinigassanngortitsineq.

AAMMA ATUARUK Tillie Martinussen attaviitsutut Folketingimut qinigassanngortittoq

Kisiannili tamanna kukkunerusoq paasineqarpoq. Malittarisassat naapertorlugit attaviitsutut qinigassanngortinneq assigalugu Tillie Martinussen partii tunuliaqutaralugu qinigassanngortissinnaavoq. Qinigassanngortitsisussarsiornissaannut pissutaavoq partiip Inatsisartuni ilaasortaatitaqannginnera, taamaammat Folketingimut qinigassanngortinnissamut malittarisassaat allaanerupput.

- Malittarisassat imaapput, partii Inatsisartuni ilaasortaatitaqanngippat 100-nik qinigassanngortitsisussarsiortoqassaaq, attaviitsuugaluaruit partiiluunniit tunuliaqutaralugu qinigassanngortikkaluaruit, Tillie Martinussen oqarpoq.

Partiip nalunaarutigimmagu Tillie Martinussen qinigassanngortittoq partiip tamanna sianigisimanngilaa.

- Naalagaaffiup Sinniisoqarfia suli oqaloqatigissallugu sianerfigisimannginnatsigu, taamaapporlu. Naatsorsuutigisimavarput Inatsisartunituut malittarisassat assigigaat. Taamalu inngilaq, taanna oqarpoq.

Suleqatigiissitsisut Inatsisartuni 2021 tikillugu ilaasortaatitaqarput, kingorna Inatsisartuni ilaasortaatitaqalernissaminnut naammattunik qinerneqannginnamik.

Qineqqusaarnermut sunnertinneq

Tillie Martinussen Suleqatigiissitsisut tunuliaqutaralugu Folketingimut qinigassanngortippoq, kukkunerullu qineqqusaarnerminut sunniuteqarnissaa ernummatiginngilaa.

- Qineqqusaarnerput aallartikkutsigu qinersisartut ingerlaannaq tusarumaarpaat suut qineqqusaarutiginerivut. Taamaammat isornartorsiornertalimmik sunniuteqarnissaa ilimaginngilara.

- Qinersisartut qinerusutatik qinissagaat ilimagaara, politikkikkut ingerlassaat toqqammavigalugit, Tillie Martinussen oqarpoq.

Tillie Martinussenip utoqqaat inuillu ikiortariallit qineqqusaarutiginiarpai.

- Nunatsinni utoqqalinersiutit Danmarkimi, Sverigemi Norgemilu utoqqalinersiutitulli amerlatigilersillugit nalimmassarneqartariaqarput. Tamanna danskit oqartussaasuisa suleqatiginerisigut immaqa anguneqarsinnaavoq, taanna ataasinngormat KNR-imut taama oqarpoq nangillunilu:

- Nunattalu inuisa akornanni napparsimasut tarnikkulluunniit nappaatillit Danmarkimut noorarnerat ingalassimaniarlugu Danmark aamma suleqatisererusupparput.

Novembarip aallaqqaataani Folketingimut qinersisoqassaaq. Inatsisartuni partiit tallimaasut qineqqusaarnermi pingaartitaat ugguuna atuarsinnaavatit.