Kitaani nunamik allanngutsaaliugaqalernissaa qanilliallattoq

Kitaani nunamik allanngutsaaliugaqalernissaata piviunngornissaa qanilliallappoq.

Qeqqata Kommunia aamma Kommune Qeqertalik nunamik allanngutsaaliugaqalernissaanik qaammatialuinnaat matuma siorna siunnersuuteqareersullu suliaq ingerlaqqippoq.  

Nunallu allanngutsaaliugassanngortitassap sumiinnissaa maanna eqqartorneqartussanngorpoq.

Innuttaasullu suleqataanissaat pingaaruteqassaqisoq Nunalerinermut, Imminut Pilersornermut, Nukissiuutinut Avatangiisunullu Naalakkersuisoq, Kalistat Lund oqarpoq:  

- Innuttaasut atuisullu sumiiffik pillugu ilisimasaat qulakkeerneqassapput, pinngitsuuinnatillu suliap ingerlaqqinneranut atorneqassallutik. Taamaalilluni nunap allanngutsaaliukkap ineriartortinneqarneranut atatillugu najugaqartut sumiiffimmi sammisaat pitsaanerpaamik eqqarsaatigineqassapput, taanna oqarpoq.

Innuttaasut aalajangiissasut

Innuttaasut piffissami aggersumi ataatsimiisinneqarlutik ilisimasaannik katersiffigineqassasut naalakkersuisoqarfik allappoq, nunamullu allanngutsaaliukkamut nalunaarusiassamut missingersuinermi aallaaviussapput.   

Ilisimasanik aatsaat katersuisoqareerpat innuttaasunillu ataatsimiisitsisoqareerpat suliassaqarfimmut killigititassat malittarisassiassallu aalajangiunneqartussaapput.

Innuttaasut piniarfigisakkaminnik aalisarfigisakkaminnillu annaasaqannginnissaat qulakkeerniarlugu taamaaliortoqarpoq. Tamatumalu peqatigisaanik masarsoqarfiit, pinngortitami naleqartitat kulturikkullu kingornussat illersorneqarnissaat qulakkeerniarneqartoq, Kalistat Lund oqarpoq:

- Sumiiffimmik atuisut nunanik nuannarisaminnik ornitaqartarnertik ingerlatiinnarsinnaavaat. Taamatut pinngortitamut atassuteqarneq kipineqanngisaannassaaq.

Avataarsualiartartoq EU-lu immersueqataasut

Innuttaasut isumaannik tusarniaanerup saniatigut avataaniit siusinnerusukkut aamma immersueqataasoqarpoq.

Suliamut tunngatillugu EU-mit aamma Wild Nature Foundationimit aallartitat avataarsualiartartorlu Andreas Mogensen isummersoqataaniarlutik tikeraareerput.

Suliniutillu piviusunngoriartuaarnera danskip avataarsualiartartup nuannaarutigaa:

- Kangerlussuarmukarpunga nuna allanngutsaaliugaq pillugu, kommunilu suleqatigiillutik pinngortitamik Wild Nature Foundation asseqanngitsumik illersuiniarluni pilersinniagaata aallunneqarnissaa siunertaralugu, taanna juunimi tikeraarnermini oqarpoq.

- Wild Natur Foundationimi oqariartaaseq kusanartoq una atorneqarpoq; ”What you love, you will protect” – tamannalu sumiiffimmut maanga naleqqulluinnarpoq, taanna isumaqarpoq.

Inuussutissarsiornermik takorluugaq

Naak nunamik allanngutsaaliugaqalernissami nunatsinni innuttaasut isumaat pingaartinneqarnerugaluartoq, taamaattoq takornariat nunarsuarmi tamaneersut soqutiginnilernissaat aamma neriuutaavoq.  

Innuttaasummi soqutigisaat innarlinngikkaluarlugit kommunip aningaasaqarneranut nukittorsaataassasoq, Kommune Qeqertalimmi borgmesteri Ane Hansen oqarpoq:

- Mittarfiit nutaat, aamma nunap allanngutsaaliukkap nutaap, kommunimit aqunneqartussap atuutilernerini ukiuni tulliuttuni takornarianik amerlanerusunik Kommune Qeqertalimmut pileritsatsitsisoqarsinnaassasoq naatsorsuutigaara, taanna oqarpoq nangillunilu:

- Naak takornariaqarneq annertusigaluartoq innuttaasut sumiiffimmi suli piniarsinnaapput, aamma aallaqqaataaniit aqutsisinnaassallutik.