KNR Naalakkersuisut siulittaasuata naalakkersuisoqarfialu kisitsisit eqqortut nassaariniarlugit oqaloqatigiipput. Atuinerlu millionit affaata missaaniittoq isumaqatigiissutigaat.Assi: KNR

Kisitsisit eqqortut: Kielsenip biilii akileraartartut millionit affaanik akileeqataaffigaat

Atuineq 688.000 koruuniusoq KNR siusinerusukkut allappoq, Naalakkersuisulli 362.000 koruuniusoq allallutik. Eqqortorli taakkua akornanniippoq.

KNR Naalakkersuisut siulittaasuata Kim Kielsenip atuuffimminut atatillugu biileqartitaanerminut 2015-imit 2019-imut 700.000 koruuningajaat aningaasartuutigisimagai septembarip 25-ani allappoq.

Tamannali eqqortuunngilaq, KNR-imilu nutaarsiassaqarnermut pisortaq ajuusaarpoq.

- Kukkunerput nassuerutigiinnarsinnaavarput. Taamannak inerniliiniarutta allanit sukumiinerusumik misissortariaqarpagut. Aamma peqqissaarussisimanasorigaluaruttaluunniit naammassimanngilaq. Taamaammat uagutsinnut qiviarluta taama pisoqaqqinnginnissaa qulakkeertariaqarparput, KNR-imi nutaarsiassaqarnermut pisortaq, Mikkel Bjarnø Lund oqarpoq.

Benzinamut, biilit aaqqissuutsinnerinut, sillimmatinut, attartornermut akileraarutinullu aningaasartuutit.
  • 2015: 103.503 koruunit.
  • 2016: 63.919 koruunit.
  • 2017: 98.995 koruunit.
  • 2018: 60.771 koruunit.
  • 2019: 167.928 koruunit.
  • Katillugit: 495.118 koruunit.

KNR-ip ulloq taanna allaaserisaq saqqummiutereeraa Kim Kielsenip Naalakkersuisut nittartagaatigut KNR-ip kisitsisit saqqummiussai naammaginartinnagit sakkortuumik isornartorsiuivoq.

- KNR-ip allakkiat eqqortumik atuarsimagunigit, Kim Kielsen-ip atuinera ukiuni tallimani kingullerni 362.142 koruuninik annertussuseqarsimasoq takusinnaasimassagaluarpaa, Naalakkersuisut nittartagaanni taama allassimasoqarpoq.

Kisitsisilli taakkua eqqortuunngillat. Taamaattumik KNR Namminersorlutik Oqartussallu eqqortuliorsimanngillat.

KNR-ip nalunaarsuinermini aningaasartuutit ataasiakkaat allagaatini titarlugit takujuminarunnaarsakkat ilannguppai. KNR-ip aningaasartuutit ataasiakkaat sumut atorneqarsimaneri paasisinnaannginnamigit ilanngussimasussaanngikkaluarpai.

AAMMA ATUARUK Kielsenip biilii nunap karsiata 700.000 koruuneerutigigai

Naalakkersuisut kisitsisaatitik ukiunut tallimanut atuuttuusut allapput. Taamaattoq naatsorsuinerminni 2019-imi septembari qaammat killiffigaat, biililli oktoberip aallartilaarnerani 130.000 koruunit nalinganut suliaritigaatsiarput.

Naalakkersuisut siulittaasuata naalakkersuisoqarfiata tamanna Namminersorlutik Oqartussat naatsorsuutinik suliaqarnermi atortuata allanngortinneqarneranik peqquteqartoq allapput.

Naalakkersuisoqarfiup naatsorsuinermini ilanngussat septembarip kingorna aningaasartuutaasut ilaannginnerat miserratiginngilaa, ilanngussat saqqummiunneqannginneranni naammaginartumik misissorneqarsimanngitsut nassuerutigalugu.

- Nalunaarsukkat, Namminersorlutik Oqartussaniit pisavut amigaateqarsimanerat pisarissersuutaavoq, taamaakkaluartorli uagutsinnut qiviassaagut. Tamanna uagut saqqummiussatta eqqortuunissaanik qulakkeerinninngitsoornissatsinnut utoqqatsissutaassanngilaq, Mikkel Bjarnø Lund oqarpoq.

Aningaasartuutit amerlasuut benzinamut akiliutaapput. Assersuutigalugu Kim Kielsenip biilini Toyota Landcruiserit 2016-imi decembarip qaammataani arfineq-pingasoriarlugit orserpai, katillugu benzinamik 295 literimik, 1654 koruuninik aningaasartuutaasumik.

KNR Naalakkersuisut siulittaasuata naalakkersuisoqarfialu kisitsisit eqqortut nassaariniarlugit oqaloqatigiipput. Atuinerlu millionit affaata missaaniittoq isumaqatigiissutigaat. 

Namminersorlutik Oqartussat maanna naammagisimaarinnipput.

- Illuatungeriit kisitsisit eqqortut KNR-ip allagaatinik takunnikkumalluni novembarip 27-ani noqqaassutaanit januaarillu pingajuani pissarsiaanit nassaarimmatigit nuannaarutigaara, Naalakkersuisut siulittaasuata naalakkersuisoqarfiani pisortaq, Hans-Peder Barlach Christensen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat