Kielsenip biilii nunap karsiata 700.000 koruuneerutigigai
Allaaserisaq una kisitsisinik eqqunngitsunik imaqarpoq. Atuineq 688.000 koruuniusoq siuusinnerusukkut allapparput. Atuinerli 362.000 koruuniusoq Naalakkersuisut allaaserisap uuma saqqummereernerani ilisimatitsissutigaat. Eqqortorli takkua akornanniippoq – 495.118 koruuniulluni.
KNR-ip kukkunini ajuusaarutigaa. Allaaserisaq una kisitsisinik eqqortunik imaqarpoq.
Tallimanngornermi septembarip 25-ani ualikkut nalunaaqutaq 14:48 Naalakkersuisut allaaserisap imaa pillugu nittartakkaminni akissuteqarput.
Naalakkersuisut malillugit Kim Kielsen ukiuni taakkunani tallimani sillimmasiinernut, akitsuutinut, aserfallatsaaliuinermut kiisalu benzinamik atuinermut 362.142 koruunit atorsimavai.
KNR-p allagaatit pissarsiani qimerlooqqippai. Naalakkersuisulli kisitsisit saqqummiussaat KNR-p allagaatinik pissarsiaanit allaanerupput.
Kim Kielsen 2014-imi novembarip 28-ani qinersinerup kingorna Naalakkersuisunut siulittaasunngorpoq. Taamanimiillu 2019-p naanissaanut akileraartartut aningaasaataat 688.619 koruunit biilinut aningaasartuutigai.
Tamanna KNR-p allagaatinik naalakkersuisut siulittaasuata naalakkersuisoqarfianut noqqaassutaani takuneqarsinnaavoq.
Kim Kielsen 2015-imi naalakkersuisut siulittaasuattut atuuffia ukioq ilivitsoq siulliuvoq. Ukioq taanna biilinut 103.750 koruninik aningaasartuuteqarpoq, siornalu akiligassat taamanernit marloriaat sinnerlugu amerlanerupput.
Kielsenip biiliinut siorna akiligassai 225.760 koruuniupput, taassumami biilini Toyota Landcruiserit 132.531 koruunit nalinganut suliaritingaatsiarpai.
Biilit soraareereermi angerlaallugit sunngiffimmini atorsinnaavai.
Qinikkatut atuuffeqarluni atorfilittatullu atorfeqarluni suliffimmut atatillugu biileqaraanni akileraartartut aningaasaataat atorlugit akiliineq inatsisitigut akuerisaavoq.
Kim Kielsenip biilini Toyota Landcruiserit 2016-imi decembarip qaammataani arfineq-pingasoriarlugit orserpai, katillugu benzinamik 295 literimik, 1654 koruuninik aningaasartuutaasumik.
Kielsenilli biiliinut nunap karsiata akiliutai inuata biileqartitaanermut akiliutaanit amerlanerujussuupput, tallimariaataanit amerlanerullutik.
Kim Kielsenip biilinut aningaasartuutai:
- 2015: 103.750 koruunit.
- 2016: 100.155 koruunit.
- 2017: 129.805 koruunit.
- 2018: 129.148 koruunit.
- 2019: 225.760 koruunit.
Tusarfik: Naalakkersuisut siulittaasuata naalakkersuisoqarfia.
Kielsenip biileqartitaanermut malittarisassaq malillugu 2015-imit 2019-imut 126.000 koruunit akileraarutitigut akilertussaavai. Piffissamili tassani aningaasartuutai 688.619 koruuniupput.
Aningaasartuutit amerlasuut benzinamut akiliinermut atorput. Assersuutigalugu Kim Kielsenip biilini Toyota Landcruiserit 2016-imi decembarip qaammataani arfineq-pingasoriarlugit orserpai, katillugu benzinamik 295 literimik, 1654 koruuninik aningaasartuutaasumik.
Oqaaseqarnianngitsoq
KNR-p Kim Kielsen aningaasanik atuinera pillugu apersorusukkaluarpaa, iluatsinnaguli.
Taasuma naalakkersuisoqarfiani pisortaq, Hans-Peder Barlach Christensen, allaffissornikkut akisussaasuulluni pisorlu pillugu oqaaseqartussaasuulluni oqarpoq.
Kim Kielsenilli atuinera pillugu oqaaseqarusunngilaq. Qitiusumilli allaffeqarfiup iluani atuuffimmi biileqarneq ataatsimut isigalugu oqaaseqarusulluni.
Kukkunersiuinermut ataatsimiitialiaq naalakkersuisut biilinut atuinerannut siorna novembarimi uparuaavoq.
- Naalakkersuisunut ilaasortat atuuffimmut atatillugu akeqanngitsumik biileqartitaanerisa aqunneqarsinnaasuusariaqarnera kukkunersiuinermut ataatsimiititaliap paasilluarpaa. Naalakkersuisulli sipaarnissamik anguniakkaminnik qaffaasinnaannginnerat ataatsimiititaliap ajuusaarutigaa. Ataatsimititaliaq taama allappoq.
Aningaasartuutit 2010-imi millionit sinneqartut 2018-imi 545.000 koruniupput, tamannalu pillugu Hans-Peder Balach Christensen ima oqarpoq:
- Namminersorlutik Oqartussat qitiusumik allaffeqarfianni aningaasartuutit ikilinikuupput, taanna oqarpoq.
Aningaasartuutit uani takukkit:
