Kinngusimasumik umiarsuaatilik Nunatta Eqqartuussisuuneqarfiani pinngitsuutitaasoq
Umiarsuarmik piginnittoq pinngitsuutinneqarpoq aallaqqaammullu akiligassaasimasumik 800.000 koruuniusumik akiliisussaajunnaarluni.
- Oqiliallannaqaaq. Nanertuutaangaatsiarsimasoq uannit peerneqarpoq, Svend Aage Larsen oqarpoq.
AAMMA ATUARUK Aalisariut umiusimasoq suliareqqitassanngortinneqartoq
Sivisoorsuarmik suliaq
Eqqartuussivimmi suliaq umiarsuarmut Tina Rosengrenimut, Nuummiit avannamut 5 sømilimik ungasitsigisumi umiusimasumut tunngasoq 2012-imi aallartippoq, umiarsuarmillu piginnittoq, unnerluutigineqartoq Svend Aage Larsen, eqqartuunneqarmat suliaq siorna naammassineqarallarluni.
Taanna Avatangiisit innarlitsaaliorneqarnissaanik inatsimmik unioqqutitsisutut eqqartuunneqarluni 400.000 koruuninik juulimi 2017-imi akiliisussanngortinneqarpoq. Tassa 2014-imi akiligassiissutaasup affaa.
Svend Aage Larsenip eqqartuussut suliassanngorteqqippaa, suliarlu Nunatta Eqqartuussisuuneqarfiata oktobarip 24-anni aalajangiiffigalugu. Tamannalu allaanerusumik eqqartuussivimmilu suliamut Svend Aage Larsenimullu ukiorpassuarni nanertuutaasimasumut inerniliigallarnerulluni.
- Pinerluuteqarsimaneragaaneq aammalu 800.000 koruuninik akiliisussanngortinneqarsinnaaneq ukiorpassuarni nanertuutaalluniliu peqqissutsinnut ajoqutaasimavoq.
AAMMA ATUARUK Umiarsuaq qimaannagaq pillugu eqqartuussivimmi suliaq kinguarteqqippoq
Suliaq eqqartuusissutigissallugu ersarluppattaartoqm
Unnerluussisussaatitaasup, eqqartuussivimmi suliamik sassaasisuusup, Christian Astrup Sørensenip eqqartuussinissamut naammattumik tunngavilersugaannginnerarpaa.
- Avatangiisit innarlitsaaliorneqarnissaanik inatsimmik unioqqutitsisutut akiligassiinissami inatsimmi unioqqutinneqartup innuttaasullu iliuuserisai ataqatigiittariaqarput, umiarsuarmillu piginnittup eqqartuunnissaanut tunngaviusoq naammanngitsoq nunatta eqqartuussisuuneqarfiata aalajangerpaa, Christian Astrup Sørensen oqarpoq.
Unnerluussummi avatangiisit innarlitsaaliorneqarnissaanik inatsimmi paragraf 37 unioqqutinneqarsimaneragaavoq, taannali ima oqaasertaligaavoq, mingutsitsissutaasumik nammineerluni iliuuseqarsimasariaqarluni.
Svend Aage Larsenilu taamaaliorsimanngitsoq Nunatta Eqqartuussisuuneqarfia isumaqarpoq. Tanna iliuuseqanngitsoorsimavoq, tassalu umiarsuup piinngitsoorsimavaa.
Avatangiisit pillugit oqartussat eqqartuussummik akuerserusunnersut, eqqartuussiveqarfiit qullersaannut suliassanngortitsissanersut imaluunniit allamik iliuuseqarniarnersut maanna apeqqutaaginnalerpoq.
Eqqartuussut Pinngortitamut Avatangiisinullu Naalakkersuisoqarfiup tigusimagaa naalakkersuisoqarfiup pisortaata Mette Skarregaard Pedersenip paasissutissiissutigaa, eqqartuussullu atuaqqissaarlugu periarfissat misissorneqassapput qanorlu ingerlariaqqissanerlutik misissorneqassalluni.
