Meeqqat kingunerlutsitsisimasut nassaarinissaannut katsorsarnissaannullu atortut Syddansk Universitiitimit PHD-nngorniummi ineriartortinneqarsimallutillu naleqqussarneqarsimapput.Assi: KNR/Anton Gundersen Lihn

Kingunerlutsitsisimasunut katsorsaariaasertaat nunatta meraartaannut iluaqutaassasut

Meeqqat nakuuserfigineqarsimasut atornerlunneqarsimasullu kingunerluutaannut paasinninnissamut katsorsaanissamullu tarnip pissusaannik ilisimasallit periaatsinik nutaanik ineriartortitsisimapput.

Meeqqat kinguaassiuutitigut atornerlunneqarsimallutik nakuuserfigineqarsimallutilluunniit peroriartortut ilaat sorsuffimmiissimasutut PTSD-mik atugaqalersinnaasut, Kristeligt Dagblad allappoq.

Meeqqat taakku ataqatigiissillugu aaqqissuussamik maannamut ikiorneqarneq ajorput. Meeqqalli kingunerlutsitsisimasut nassaarinissaannut katsorsarnissaannullu atortut Syddansk Universitiitimit PHD-nngorniummi ineriartortinneqarsimallutillu naleqqussarneqarsimapput.

Atortut nunatsinni atorneqartussanngorput. Nunatsinnimi kommuninit tallimanit maannamut pingasuni pilersaarusiortoqarpoq.

AAMMA ATUARUK 80 millionit koruunit kalaallit meerartaannut Folketingimit aningaasaliissutigineqarput

- Meeqqat kingunerlutsitsisimasut nassaarijaanerusassagutsigit, sukkanerusumik ikiortarsinnaavagut, kingunerluutaasalu ersiutaat millisissinnaallutigit. Taava meeqqat assersuutigalugu atuarfinni aallussisinnaanerussapput, tarnikkullu aamma timikkut kingusinnerusukkut ajornartorsiulersinnaanerannut navianartoq millisissinnaallugu, tarnip pissisaanik ilisimasalik postdocilu Syddansk Universitetimi Videnscenter for Psykotraumatologimeersoq Sille Schandorph Løkkegaard oqarpoq.

Meeqqat kinguaassiuutitigut atornerlunneqarsimasut nakuuserfigineqarsimasulluunniit malunnartumik atugarlioraluarlutik katsorsarneqarnissaminnut utaqqisariaqartartut Kommune Kujallermi ilaqutariit sullissivianni tarnip pissusaanik ilisimasallip Naja Lund Kielsenip naammattoortarsimavaa.

Misitsinnerit nunatsinnut tulluarsaruminartut

Atortut nunatsinnut tulluarsarlugit atortussanngornissaat kommunip maanna sulissutigaa. Naja Lund Kielsenilu naapertorlugu atortut meeqqanik inuusuttunillu ikiuinissamut atorfissatartinneqarput.

- Inersimasut innarligaasimasut katsorsarnissaat ukiorpassuarni sulissutigaarput. Meeqqanulli inuusuttunullu atortunik pitsaanerusunik atorfissaqartitsilluta ukiorpassuarni oqaatigisarparput. Meerarpassuit kingunerluuteqarput. Tamatumunnga kinguaassiuutitigut atornerlunneqarneq nakuuserfigineqarnerlu kisimik pissutaanngillat, kisianni aamma pinngortitaq sakkortusinnaasoq qanittuararsuummat, inuiaqatigiinni ajunaarfiusinnaasumi inuuneq. Kalaallit Nunaanni misigisat kingunerlutsitsisinnaasut taamaalillutik naliginnaasorujussuusinnaapput, Naja Lund Kielsen oqarpoq.

Periaatsimi nutaami ilaatigut pinnguarnikkut misiliisoqartarlunilu titartakkanik oqaluttuat atorlugit misiliisoqartarpoq. Taakku meeqqap inuunini qanoq misigineraa pillugu paasisaqarfiusassapput. Meeqqap pinnguarnikkut misilitsinnermini apersorneqartutut misigisimaneq ajornera nunatsinnullu naleqqussaruminarnera taama misiliinerup iluaqutigigaa Naja Lund Kielsenip erseqqissaatigaa.

Folketingi meeqqanut innarlerneqarsimasunut ukiunut tulliuttunut sisamanut 80 millionit koruunit sapaatit akunnerata siuliani immikkoortitsivoq.

Naalagaaffiup Innutaasut Peqqissusaannik Misissuisoqarfia naapertorlugu meeqqat nunatsinni 1990-ip kingorna inunngortut pingasuugaangata ataaseq imerajuttunik angajoqqaaqarluni nakuuserfiusartumi peroriartorpoq, meeqqallu tallimaagaangamik ataaseq kinguaassiuutitigut atornerlunneqarsimavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat