80 millionit koruunit kalaallit meerartaannut Folketingimit aningaasaliissutigineqarput

Aningaasat 849 millionit koruunit isumaginninnikkut peqqinnissakkullu suliniutinut immikkut atorneqarnissaat, Folketingimi amerlanerussuteqartut isumaqatigiissutigaat.

Kalaallit meerartaannut suliniutinut 80 millionit koruunit ukiuni tulliuttuni sisamani immikkoortinneqarnissaat, Folketingimi partiit tamarmik, partii Nye Borgerlige minillugu, isumaqatigiissutigaat.

AAMMA ATUARUK Abelsen Kragilu atsioqatigiipput: Danskit meeqqanut inuusuttunullu tunngatillugu ikiuunnissaat qulakkeerpoq

Soorlu KNR-imi siusinnnerusukkut oqaluttuarigipput meeqqat kinguaassiutitigut atornerlunneqarsimasut sullinneqarnissaannut 80 millionit koruuninik ukiuni tulliuttuni sisamani maanna immikkoortitsisoqartussanngorpoq.

- Meeqqat Kalaallit Nunaanni kinguaassiutitigut atornerlunneqarsimasut sullinneqarnissaat pillugu aningaasaliisoqarsinnaammat nuannaarutigilluinnarpara. Suliat aallartinneqarnissaannut Danmarkip Kalaallit Nunaatalu naalakkersuisuisa isumaqatigiissutaaat maanna aallartissinnaanngorput, Danmarkip isumaginninnermut nunamullu namminermut ministeria Astrid Krag taama oqarpoq, nangillunilu:

AAMMA ATUARUK Danskit isumaginninnermut ministeriat tikeraartoq: Nunatsinnut tapiissutaareersut 80 millionit koruuninik ilaneqarnissaat kissaatigigaa

- Kalaallit meerartaasa sullilluarneqarnissaat pillugu iliuuseqarsinnaanerput pingaaruteqarluinnarpoq, ministeri oqarpoq.

Kalaallit Nunaanni meeqqat ikiorneqarnissaat Danmarkimi naalakkersuisut socialdemokratineersut pingaartippaat, meeqqallu kinguaassiutitigut atornerlunneqarsimasut ikiorneqarnissaat pingaartillugu, statsministerip Mette Frederiksenip, nunatsinnut tikeraarnermini oqaatiga.

Isumaginninnikkut peqqinnissakkullu suliniutinut aningaasaliissutini kalaallit meerartaannut 80 millionit koruuninik aningaasaliinerit annernut ilaapput, aningaasallu ukiuni tulliuttuni sisamani aningaasaliissutigineqassallutik.

/ritzau/