Kingunerlutitsisumut anaanaasoq: Ernerma malissuaqarnissaa suli annilaanngatigisarpaa
Nuugaatsiamiit qimagutsitaaneq nukappiaqqamut maanna qulingiluanik ukiulimmut kingunerlungaatsiarpoq.
- Nuanniilliornerpaaffimmini oqaluttalernikuuvoq soormimi toquinnallaruma, soormimi Nuugaatsiamiillunga toqoqataasimanngittunga. Anaanaalluni annernartorujuungami, Ivalu Møller oqarpoq.
Taanna 31-inik ukioqarpoq, nukappiaqqanut marlunnut anaanaavoq kisimiittoq, Nuugaatsiamioq, maanna Uummannami najugalik.
2017-imi tassaarsuaqarnera eqqaamalluarpaa. Ernera maanna qulingiluanik ukiulik tallimaannarnik taamani ukioqarpoq.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Malissuit Nuugaatsiamut anngummata ernini qaqqamut qimaaqatigaa. Meerarli alla sissami ikiornissaqanngitsoq takugamiuk ernini oqarfigaa qaqqamut qimaasunut akuleruteqqullugu, erninilu malikkumaarlugu oqarfigalugu.
Ivalu Møllerip meeraq ikiorneqanngitsoq aavaa qaqqamukaqatigalugulu. Ernera qaqqamiilereerpoq, Uummannamullu ullumikkut illoqarfigisaminnut qimagutsinneqarput.
Sinissinnaaneq ajortoq
Tamanna misigisaq erneranut sakkortoqaaq. Ullormi taanna suli utersaarfigisaraa, Ivalu Møller oqaluttuarpoq.
- Kamarujussuartarpoq, qiarujussuartarpoq iluamik sinissinnaaneq ajorpoq, Ivalu Møller oqarpoq.
Ernini annilaarnartumik misigisimaleraagami, kamalluni, nukersorluni qinngamigut aalertartoq, Nuugaatsiamiikkusunnerarlunilu oqaluttartoq Ivalu Møller aamma oqarpoq.
Aperigaanni suna ersinarami, malissuaqassanasualugumi, Ivalu Møller oqarpoq.
Ernera Nuugaatsiaq tassaarsuarluunniit raatiukkut tv-kkullu eqqartorneqaleraagat imaluunniit inuppassuit akornaniileraagami pisimasunut utersaartoortarpoq.
Assi: Malik Brøns
Aamma aaqanngitsunik atikkersorsimasunik takugaagami. Qimagussuinermimi sulisut aaqanngitsunik atorsimapput.
Aasalernera
Tassaarsuaqarmat aasarissuuvoq, avannaanilu seqineq kaaviinnarpoq. Uummannamilu maanna taamaaliartorpoq. Aasalernera Nuugaatsiami pisunut aamma utersaartitsivoq.
- Neriumajunnaaqqavoraasiit. Kisimiinnermini sianertaartalerpoq, anaana ersivunga qaagit. Aperigaanni suna ersinarami, malissuaqassanasualugumi, Ivalu Møller oqarpoq.
Tassaarsuaqaqqissinnaanissaa aarlerisaarutigalugu Naalakkersuisut innuttaasunut saqqummiimmata Ivalu Møllerip misigereernikuugamiuk annilaanngatiginagu oqarpoq. Annaasaqaqqissinnaanissanili kisiat merseraa.
AAMMA ATUARUK Ujarassiooq Karrat Kangerluat pillugu: 2017-imi pisumit ajornerujussuusinnaavoq
Naalakkersuisut Uummannarmiunik ataatsimeeqateqarmata Ivalu Møller peqataavoq. Nuummiit ataatsimeeqateqariartortut tarnip pissusiinik ilisimatuumik angalaqateqarput. Taakku Ivalu Møller attaveqarfigisimavaat, ikiorneqarnissanilu ernermilu ikiorneqarnissaa neriuutigaa.
Uummannami ikiortissanik noqqaasarunnaarsimavoq. Isumaqarami najukkami sullissisut ernerminut ikiuussinnaanngitsut, naak misileereeraluarlutik.
Nunaqarfimmi najugaqaleqqikkusuppoq
Ivalu Møller erninilu tassaarsuaqareertoq Nuugaatsiamut takuniaapput. Ernerami uteqqikkusukkaluaqimmat. Taamani uteqqinnerminni ernerata pinngussani sikkilinilu ujarsimagaluarpai.
- Ulloq manna tikillugu sikkileqaqqikkusukkunnaarnikuuvoq. Immaqa pissutigivaa sikkilerluni ateraluarnikuugami malissuaqalereertoq.
Ernini ikiorniarlugu nunaqarfimmi najugaqaleqqikkusuppoq. Nunaqarfilli sorliussanersoq aalajangiusimanagu, inuppassuaqanngitsumiikkusupporli.
- Nunaqarfimmeerusuttarami assorujuk. Taavalu najugassaq eqqarsaatigalugu maaniittariaqartarluta. Takorloorsinnaagaluarpata nunaqarfimmi najugaqaqqilerluta.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
