Naluttartut peqatigiiffiata siulittaasua qisuariartoq: Kinguneqalereertoq malunnarpoq, aaqqiissuteqalersaartoqarnanilu

Naluttarfik Malik allilerneqartinnagu nutarterneqaqqaartariaqartoq, Kommuneqarfik Sermersuup aningaasaqarnermut ataatsimiititaliaa sapaatit akunnerata siuliani aalajangerpoq.

Tassa naluttarfik Maliup nutarternissaanut qaquguugaluarnersumiit ukiumi ataatsimi matoqqanissaa suli pilersaarutaavoq.

Nalunnermik nuannarisallit aallussallillu ornittagaqaannarsinnaaqqullugit naluttarfik Maliup matoqqanerani naluttarfiugallartussamik pilersitsisoqarsinnaannginnersoq, Nuummi naluttartut peqatigiiffianneersut upernaaq ataatsimeersuarnerminni oqaluuseraat.

Naluttarfimmik angallattagassarsinissaq siunnersuutigineqartunut ilaavoq. Sulili tassa aaqqiissuteqalersaartoqanngitsoq, Nuummi naluttartut peqatigiiffiata siulittaasua Karl Zinglersen oqarpoq.

- Erseqqissunik suli aaqqiissuteqalersaanngilagut. Tamatumunnga atatillugu siunnersuutivut pillugit suli uterfigineqanngilagut. Uagut nammineerluta iliuuseqangaarsinnaannginnatta neriuppugut qanoq aaqqiissuteqarallarnissamik oqaloqatiserineqarumaartugut.

Kinguneqalereernera malunnartoq

Naluttarfik Maliup ukiumi ataatsimi matoqqasussanngornera Nuummi naluttarfimmik atuisunut qanoq kinguneqartigisussaassanersoq, siusinnerusukkut oqaluttuaraarput.

Naluttarfiullu mattoqqasussanngornera peqatigiiffimminnut sunniuteqarnerlulereertoq, Nuummi naluttartut peqatigiiffiata siulittaasua oqarpoq – naak naluttarfiup qaqugorpiamiit matoqqanissaa suli aalajangerneqanngikkaluartoq.

- Sungiusaasuunerinikuusarput illoqarfitsinniit nuuppoq. Inuusuttortaqalaarpugulli. Taakkunannga angajullerni siuttut 13-iliingajalersuupput. 16-it missaanni ukioqartuukkajukkaluarput. Inuusuttunik ilaasortaqaannarniapiloornartarpoq, amerliartornatillu, Karl Zinglersen oqarpoq.

Karl Zinglersen Nuummi naluttartut peqatigiiffianni siulittaasuuvoq. Naluttarfik Maliup matuneqarallarnissaata kinguneqarnerlussinnaanera siooqqatigaluarlugu allilerneqareeriarpat, tamanna piukkunnaatilinnik nutaanik - aamma nunanit allaneersunik – ilaasortaqarnerulernerannik kinguneqassasoq, taassuma neriuutigaa. Assi © : Thor Bill / KNR

Peqatigiiffitsilli utoqqarnit, meeqqanit kajumissutsimillu suliaqartuusunit naluttarfiup matoqqareernerani ammaqqippat suli eqqaamaneqassasoq taakkulu peqatigiiffimmik siuarsaaqataajumaartut, Nuummi naluttartut peqatigiiffiata siulittaasuata neriuutigaa.

- Ilaasortatta naluttarfissaalatsileriarunik nuunnatik illoqarfitsinniiginnarnissaat peqatigiiffitta ingerlalluaannarnissaanut pisariartikkatsigit pingaaruteqarput. Ilaasortaqaannarnissarput neriuutigaarput, qanoq aaqqiissuteqartoqassanersoq allilerneqassanersorlu ilisimatitsisoqarnissaata tungaanut. Tassunga killitsinnagu naluttarfimmik suli atuisinnaanerput nuannaarutigiinnarsinnaavarput.

Naluttarfik qaqugu nutarterneqalissanersoq suli aalajangerneqanngilaq.

Allilerneqarpat periarfissaqanerulersitsissasoq

Partiit tamarmik naluttarfiup iluarsartuunnissaanut aningaasaaliissutissanik sapinngisamik ujartuinissamik siunnersuutip aningaasaqarnermut ataatsimiititaliami taasissutigineqarnerani isumaqataaffigigaat, borgmesterip tullersortaa oqarpoq.

Tamannalu kalaallit nalunnermik piukkunnaatillit periarfissaqarnerulernerannik kinguneqassasoq, Nuummi naluttartut peqatigiiffiata siulittaasuata Karl Zinglersenip neriuutigaa.

- Allilerneqarpat, tamanna nunatsinni timersoqatigiiffinnut, timersoqatigiiffinnullumi allanut nunani avannarlerniittunut, USA-miittunut nunaniluunniit allaniittunut qularnanngitsumik soqutiginnilersitsisorujussuullunilu periarfissatsialarujussuusussaassaaq.

Taamaammat nunat tamalaaneersut nalunnermik nunatsinni unammiuaartalernerannik kinguneqarsinnaasumik Nuummi naluttarfik orniginarsarlugu allilerneqarumaartoq, Karl Zinglersenip neriuutigaa.

- Peqatigiiffitsinni inuusuttatsinnik Islandimut Danmarkimullu unammiuaariartitsisarpugut, ukiumullu marlussoriaannarluta taamaaliorsinnaasarpugut. Nuummili naluttarfik allilerneqarpat, tamanna nunanit allaneersunit orninneqartalernitsinnik kinguneqarsinnaavoq. Allilerneqarnissaanulli piffissaq suli ungasippoq.