Naluttarfik: Matutinnagu allilerneqassanngitsoq

Nuummi innuttaasut 500-t naluttarfimmik Malimmik ullormut atuisarput. Naluttarfilli maanna matungajalerpoq – naak innuttaasut tamatumunnga akerliugaluartut.

Naluttarfiup iluarsartuunneqarnissaa pissutigalugu ukiumi ataatsimi matoqqassasoq siorna nalunaarutigineqarpoq. Tamatuma kingunerisaanik klubbit innuttaasullu iluarsartuussinerup nalaani nalukkiarfigisinnaasaqarnissaat pissutigalugu naluffiusinnaasumik nutaamik sanaartortoqaqqaarnissaa innuttaasunit siunnersuutigineqarpoq.

Kommune naluttarfiup 160 millionit koruunit missaannik naleqartumik, 2.300 kvadratmeterimik annertussuseqartumik alliliinissaa tassani siunnersuutigineqarpoq.

Siunnersuulli taanna naammassineqarsinnaanngikkallarpoq.

Iluarsartuussinissarmi utaqqisinneqarsinnaajunnaarpoq. Kommuneqarfik Sermersuumi aningaasaqarnermut ataatsimiititaliami kingullermik ataatsimiittoqarnerani tamanna erseqqissaatigineqarpoq.

Naluttarfiup allilerneqarnissaa partiit akornanni isumaqatigiissutigineqartoq, Justus Hansenip (Demokraatit) oqaatigaa. Aningaasassarsiortoqaqqaassaarli, politikerillu tamanna aappaalu missingersuutit pillugu isumaqatigiinniarnerminni misissuiffigissavaat. Assi © : KNR / Markus Valentin

Tamanna borgmesterip tullersortaata, Justus Hansenip (Demokraatit) oqaatigaa.

- 28 millionit koruunit (iluarsartuussinissamut aaqq.) missingersuutini immikkoortippagut. Tamanna utaqqisinneqarsinnaanngilaq, piaartumik aallartissaagut. Naluttarfiup ataani imeq tissaluppoq. Ilaanni iluarsartuussinissamut ukiorpassuarni kinguartitsisareernikuusimagaanni  taama aalajangiisoqartariaqartarpoq.

Siunissaq nalunartoq

Jan Tengstedt naluttarfiup allilerneqarnissaanut innuttaasunit siunnersuuteqartuuvoq. Naalli taassuma aningaasaqarnermut ataatsimiititaliap aalajangernera pakatsissutigigaluarlugu tamanna tupaallaatiginngilaa.

Taamaakkaluartorlu taassuma matusineq peqatigiiffimmut qanoq kinguneqarnissaa ernumassutigaa.

- Naluttartut peqatigiiffianni ilaasortat kateriffissaaruttussanngorput. Timersoqatigiiffiit allat assigalugit timersortarfinnut allanukariaannaanngillat. Sungiusarnissamut ukioq ataaseq utaqqiinnartoqarsinnaanngilaq. Meeqqat ilaat sapaatip akunneranut sisamariarlutik sungiusartarput. Taakku sulorariaannassasut oqaannartoqarsinnaanngilaq.

Politikerit sanaartornissamut aningaasassarsisinnaassappata naluttarfiup Maliup allilerneqarnissaa ima isikkoqarsinnaavoq. Assi © : Clement & Carlsen Arkitekter APS

Aningaasaqarnermut ataatsimiititaliaq naluttarfiup qanoq inneranik nalunaarut tunngavigalugu aalajangiivoq. Jan Tengstedtip nalunaarusiaq nammineerluni atuarsimanngilaa, politikerilli nalunaarusiami iluarsartuussinissaq utaqqisinneqaqqissinnaajunnaartoq oqaatigineqarnera pissutigalugu iluarsartuussinissamik salliussisariaqartariaqarnerat paasisinnaalluinnarpaa.

Naluttartullu peqatigiiffiannut aamma meeqqanut kingunissaata uggorinerata saniatigut nunanut tamalaanut mittarfiup ammarneqangajalernera ilutigalugu illup iluani sammisassanik kommunip matusinissaa aamma uggoraa.

- Nunatsinnut tikikkaanni sammisassarpassuaqarpoq, kisianni sapaatip akunnerani takornariarluni tikikkaanni illup iluani sammisassat amigaataapput.

- Tamatuma saniatigut nunarsuarmi sumiiffinnit assigiinngitsunit naluttartut peqatigiiffiinit inuusuttunik nunatsinnukartitserusuttorpassuaqarpoq. Taakku ilaquttatik ilagalugit nunatsinnut aningaasarpassunik atuerusupput. KIsianni unittooqqaannarpugut, mittarfiup ammangajalernera eqqaassanngikkaanni maani susoqanngilaq, Jan Tengstedt oqarpoq.

Alliliisoqarumaartoq

Alliliinissarlu pisariaqartoq partiit tamarmik isumaqatigiissutigaat. Tamanna Justus Hansenip oqaatigaa.

- Mittarfiup ammangalernera ilutigalugu siunissamut piareersassaagut. Atuisartullu amerliartuinnarput.

Tamannalu aamma pissutigalugu politikerit alliliinissap piviusunngortinneqarnissaanut aningaasat qanoq pissarsiarineqarsinnaanerannut periarfissanik misissuipput.

Maliup iluarsartuunneqarnissaa qaqugu aallartissanersoq suli naluneqarpoq.