Politikki

Kinguaassiuutitigut atornerluinikut ikiorserneqartalissapput

Kinguaassiuutitigut atornerluisimasut ikiorserneqarusukkunik saaffissaqanngillat. Kinguaassiuutitigut atornerluisarnerit akiorneqassappata, atornerluisimasoq aamma katsorsarneqartariaqartoq, tarnip pissusaanik ilisimasalik 8. marts gruppemut ilaasortaq, Inuk Bourup Nielsen ippassaq radioaviisimut oqarpoq.

Allattoq Ane-Marie Petersen, Paarnaq Hansen

septembarip 10-at 2015 17:52

Isumaginninnermut Naalakkersuisoqarfiup 2 millioner koruunit kinguaassiuutitigut atornerluisimasut katsorsarneqarnissaannut aningaasaliissutigisimagai, isumaginninnermut naalakkersuisoq Martha Lund Olsen nalunaaruteqarpoq.

- Annersaasartut, pinngitsaaliisartut taakkua katsorsarneqarnissaat aallavigalugit immikkut ukioq manna 2 millioninik pinikuuvugut ukiunilu aggersuni. Taamatut katsorsaasalernissamik aamma aallartitsinissatsinnik immikkut ittumik aaqqissuussamik, isumaginninermut naalakkersuisoq, Martha Lund Olsen oqarpoq.

Aamma atuaruk Kinguaassiutitigut atornerluisoq aamma ikiorneqassaaq

2013-imili Isumaginninnermut Naalakkersuisoqarfik kinguaassiuutitigut atornerlugaasimasunik katsorsaavimmik aallartitsivoq. Tarnip pissusaanik ilisimasallit sisamat nunatsinni angalasarput, kinguaassiuutitigut atornerlugaasimasunik katsorsaajartorlutik.

- Katsorsaaneq aqqutigalugu pinaveersaartitsinerit ingerlappagut, eqqartuisarnikkut taamatut nalaataqarsimalluni imminut katsorsassalluni taava iliuutsikkut aamma allannguuteqarsinnaaneq taanna pigatsigu, Martha Lund Olsen oqarpoq.

Nalunaarusiaq "Kalaallit Nunaanni inuusuttut"-mi atuarneqarsinnaavoq meeqqat inuusuttullu arfineq pingasut 14-nillu akornini ukiullit 34 %-ii kinguaassiuutitigut atornerlugaasimasut.

Kinguaassiuutitigullu atornerluisuusut katsorsarneqarnissamut periarfissaqalissapput.

Isumaginninnermik naalakkersuisoq aamma oqarpoq suliniut aallartitartik aqqutigalugu qimarnguiit ilaqutariinnullu sullissiviit ataqatigiinnerulernissaat qulakkeerneqassaaq.