Kinguaassiutitigut atornerluisoq aamma ikiorneqassaaq
-Ajornartorsiut qaangerniassagutsigu taava eqqugaasoq kisiat pinnagu aamma pinerliisoq ikiorneqartariaqarpoq, 8. marts gruppimi ilaasortaq, Inuk Bourup Nielsen taama oqarpoq.
Pinngitsaaliilluni atoqateqartartup pissusini allanngortinniassaguniuk ikiorneqarnissaminik pisariaqartitsisoq, Inuk Bourup Nielsen isumaqarpoq.
-Pissusilersuutaa torinngittoq, killissamik qaangiisoq, kusanaatsoq, inoqammik ataqqinninngittoq allanngortinniassaguniuk, aammalu qanoq iliornissani ilisimanngippagu taakkununnga ilitsersuutinik arlaanik peqartuuppat iluaqutaasinaassagaluaramik, Inuk Bourup Nielsen taama oqarpoq.
Aamma atuaruk Naaja: Pinngitsaaliilluni arnerinerni qaffasinnerpaajuvugut - kanngusuttariaqarpugut
Pinngitsaalineqarlutik atoqatigineqartartut Nunatsinni amerlanerujussui ikilisissagutsigit eqqorneqartoq kisimi taakkartorneqassanngitsoq, 8 marts gruppimit isumaqarput.
Tassami pinngitsaaliilluni atoqateqarniartoq siusinnerusukkut unitsinneqarsinnaagaluarpat pinngitsaaliilluni atoqateqartoqarnera pinngitsoortinneqarsinnaassammat, 8. marts gruppi isumaqarpoq.
Taamaammat meeqqanut aamma paasititsiniaaneq pingaaruteqartoq oqaatigaat.
Aamma atuaruk Meeqqat illersuisuat: - Meeqqat illersornissaannut iliuutsivut annikippallaarput
Pinngitsaaliilluni atoqateqartartup ullumikkut ikiorneqarusukkuni saaffissaqannginnera ajuusaarutigaat.
Atornerluisartummi ikiorneqartartuuppata, pinngitsaalitillutik atoqatigineqartartut ikilissagaluartut, Inuk Bourup Nielsen oqarpoq.
-Pingitsaaliisoqarsimagaangat taava saaffissaasuaneq takussaasorujussuugami, amigaatigaagut paasissutissat soorlu pingitsaaliisoqarsimagaangat, sumut saaffiginnissinnaappat aammalu qanoq iliortoqarsinnaava, 8. marts gruppimi ilaasortaq, Inuk Bourup Nielsen taama oqarpoq.