Kinap puussiat plastikkit inerteqqutigilerniarai
Plastikkikut avatangiisinut ajornartorsiutaasut iliuuseqarfiginiarneqarput, plastikkinillu atuinerup tuniniaanerullu annikilliserujussuarnissaannut naalagaaffik sulinialersoq, Kinami oqartussat sapaammi nalunaarutigaat.
Kinami puussiat, nerinermut atortut milluaatillu plastikkikut amerliartortut ajornartorsiutaapput.
Plastikkikut ataasiartakkat mingutsitsisut nunarsuarmi avatangiisinut unammillernarnerpaasut, Naalagaaffiit Peqatigiit nalunaarutigaat, Kinamimi eqqaavissuit kuussuillu plastikkikunik ulikkaaveqqapput.
Taamaattumik plastikkikut ataasiartakkat illoqarfinni, neriniartarfinni nunaateqarfinnilu atorunnaarsillugit inerteqqutaalersikkusunneqarput, Kinami ineriartortitsinermut iluarsartuusseqqinnissamullu kommissioni avatangisiinillu ministereqarfik taama aalajangerput.
Illoqarfinni anginerusuni tamani puussiat plastikkit 2020-p naalivinnerani inerteqqutaalissapput. Kinallu illoqarfiini plastikkit atorunnaarsinneqassallutik.
Illoqarfinnili nerisassanik tuniniaaviit plastikkinik 2025-p tungaanut atuisinnaatitaassapput.
Illoqarfinnili plastikkikunik atuiunnaartoqarnissaa kisimi sulissutigineqanngilaq, puussiammi plastikkikut inerteqqutaalernissaat anguniarneqarpoq.
/ritzau/Reuters
