Ilisimatooq: Kinamiut sunniuteqarpallaarnerulernissaat danskit ernummatigivaat
- Danmarkimi naalagaaffiup isertortumik paasiniaasartuisa aarlerinaatilinnik ukiuni makkunani nalilersuinerisa takutippaat, kinamiut Kalaallit Nunaanni pisissagunik Kina Kalaallit Nunaata politikkianut naleqqutinngitsumik sunniuteqangaatsialersinnaasoq, Københavnip universitetiani naalagaaffiit pissusaannik ilisimatusarfimmi ilinniartitsisoq Camilla T. N. Sørensen KNR-imut oqarpoq.
AAMMA ATUARUK Kangilinnguit pisariaqartipparput
Nunatsinni kinamiut aningaasaliigaluarunik naalagaaffeqatigiinnerup akornanni soqutigisat illuatungeriilersinnaasut, Camilla Sørensenip nassuiaatigaa.
Lars Løkke Rasmussenip kinamiut suliffeqarfiutaata sakkutooqarfiusimasumik piserusulluni soqutiginninnera itigartinniarlugu Kangilinnguit ammaqqinnissaanut, danskit partiianni siulittaasut qanoq isumaqatigiissuteqarfigisimanerai, danskit tusagassiorfiisa arlallit oqaluttuaraat.
AAMMA ATUARUK Danmarkip namminersornerput taamaatikkusukkaa
Qujaukitsup danskit naalakkersuisui isornartorsiorpai
Nunanut allanut naalakkersuisup Vittus Qujaukitsup Nunatta ilaatigut nunanut allanut politikkimut tunngatillugu kissaataanik danskit naalakkersuisuisa soqutiginninnginnerat isornartorsiormagu sakkutooqarfiusimasumut suliaq eqqartugaanerulerpoq.
Camilla T. N. Sørensenip nassuiaatigaa, kinamiut suliffeqarfiutaat Kinami naalakkersuisunut qanoq atassuteqarnersoq paasissaannginnera, danmarkimi naalagaaffiup isertortumik paasiniaasartuisa pasitsannartoqartippaat.
- Piviusumilli naluarput nalaatsortumik taamaannersoq, Camilla T. N. Sørensen oqarpoq.
Paarlattuanilli Nunatsinni politikerit aatsitassarsiornerup ineriartornissaanut sulissuteqarput, tassungalu aningaasat ilisimasaqarnerlu pisariaqartinneqarput. Taakkulu marluk kinamiut tunniussarisinnaavaat.
- Kina kiinamiullu suliffeqarfiutaat kalaallit politikeriinit taakkualu atorfilittaannit peqatissatut aningaasaliisussatullu ilimanarnerpaasutut isigineqarput, aningaasaliissutissat pisariaqartut tikikkuminaatsunilu aatsitassarsiornermi piginnaasat naapertuuttut pigikkajummatigit misilittagaqarlutillu, Camilla T. N. Sørensen oqarpoq.
