Vittus: Danmarkip namminersornerput taamaatikkusukkaa

Camp Century pillugu aaqqiiagiinnginneq danskillu nunanut allanut tunngasunut ministereqarfiata Ironbarkimi piiaanissamik akuersinera Vittus Qujaukitsup danskit naalakkersuisuinik isornartorsiuineranut peqqutaapput.
- Ilisimatitsissutigaara Danmarkip alloriarneq tamanna ingerlatissappagu isumaqatigiissutinik ersarissumik unioqqutitsissasoq, aatsitassarsiornermummi inatsit Kalaallit Nunaannit 2010-mi tiguneqartup danskit oqartussaasuinut utertinneqartariaqarneranik kinguneqassammat, Vittus Qujaukitsoq allappoq. Assi © : KNR
decembarip 20-at 2016 16:45
Nutserisoq Sara K. Jakobsen

- Anneruniarneq naalagaaffeqatigiinni atassuteqarnitsinnut aserorsaataalluinnarpoq, nunanut allanut naalakkersuisoq Vittus Qujaukitsoq aviisimit Politikenimit sapaatip-akunnerata siuliani apersorneqarnermini oqarpoq.

Sukannersaarmallu nunanut allanut tunngasunut sillimaniarnermullu ataatsimiititaliap isumasioqatigiumallugu tallimanngormat aggersarpaa, ataatsimiititaliamullu nassuiaatai KNR-ip allagaatinik takkunnikkumanikkut pissarsiarai.

AAMMA ATUARUK Danmarkip anneruniarnera aserorsaataalluinnarpoq

Danskit amerikamiut sakkutooqarfiat qimataq Camp Century pillugu iliuuseqarnerat iliuuseqannginneralluunniit Qujaukitsup naammaginngikkaa tassani ersippoq:

- Maanna ukiut pingajussaannik raatiup qinngorneranik mingutsitsisoqarsimasinnaaneranik misissuinissamut kalaallit kimigiisernerigaluat Danmarkimit itigartittuarneqarsimavoq, ilisimaarikkassittullu Danmarkip novembarimi ilisimatitsissutigaa maanna inatsisitigut isumaqatigiissutit misissuiffigineqalersut, akisussaaffimmik inissiisoqartinnagu, Vittus Qujaukitsoq allappoq.

AAMMA ATUARUK Ataatsimiititaliap Qujaukitsup nassuiataa tusaatissatut tiguaa

Taava Danmarkip Thule Air Basemi sullissinissamut isumaqatigiissutikkut sumik angusaqarusunnera aammalu Inatsisartut Naalakkersuisullu tamatumuunakkut nunatsinni inuiqatigiinnut isertitsissutaanerunissaannik kissaataat aaqqiagiinngissutaasoq, Qujaukitsoq nassuiaavoq.

Pituffik Camp Centurylu pillugit aaqqiiagiinnginneq sioqqullugu Namminersorlutik Oqartussat danskillu naalakkersuisui aatsitassanut tunngatillugu aamma akerleriipput. 

Nunatsinni aatsitassarsiorniarluni qinnuteqaatit danskit naliliiffigisarniarai

Tassami nunatsinni aatsitassarsiorniarluni qinnuteqaatit naliliiffigisarniarlugit danskit nunanut allanut tunngasunut ministereqarfiata nalunaarutigisimavaa, taamaaliormallu Vittus Qujaukitsoq ima qisuariaateqarpoq:  

- Ilisimatitsissutigaara Danmarkip alloriarneq tamanna ingerlatissappagu isumaqatigiissutinik ersarissumik unioqqutitsissasoq, aatsitassarsiornermummi inatsit Kalaallit Nunaannit 2010-mi tiguneqartup danskit oqartussaasuinut utertinneqartariaqarneranik kinguneqassammat, Vittus Qujaukitsoq allappoq.

Ironbarkip Citronen Fjordimi aatsitassarsiornissamik pilersarutaanut nunanut allanut tunngasunut ministereqarfik "akuersissuteqarsimaneranik" Namminersorlutik Oqartussat isornartorsiuteqarlutik allagaat, Qujaukitsup ataatsimiititaliamut uppernarsaatissatut nassarpaa.