Løkkep kinamiunik itigartitsinissamik aalajangernera tapersersorneqarluartoq
Aviisi ullormut saqqummersartoq Politiken naapertorlugu, Enhedslistenip nunanut allanut tunngasunut oqaaaseqartartua Nikolaj Villumsen ima oqarpoq:
- Sakkutooqarfik kinamiunut tunineqartariaqarsorinngivippara. Kinamiut makitasaartupilussuusut takusarpagut. Kinamiut Kalaallit Nunaanni soqutigisaqartupilussuanngoraluarpata, tamanna qularnanngitsumik sillimaniarnikkut politikkikkut ulorianaateqartupilussuussaaq.
Aamma atuaruk Kinamiut piserusuttut pillugit ataatsimiititaliaq ilisimatinneqarsimanngitsoq
Kangilinnguit pisiarinissaannik kinamiut suliffeqarfiata soqutiginninneranik ministeriunerup illersornissaq pillugu isumaqatigiissuteqartuni partiit siulittaasuinik ilisimatitsisimanera ippassaq saqqummiunneqarpoq.
Piserusuttup itigartinneqarnissaa partiinit taperserneqarpoq, taarsiullugulu Kangilinnguani sakkutooqarfiusimasoq Illersornissamut qullersaqarfimmit atugassatut ammaqqinneqartussanngorluni.
Enhedslistenilu partiit illersornissaq pillugu isumaqatigiissuteqartut avataanniittoq aamma taama isumaqarpoq.
AAMMA ATUARUK Kangilinnguit kinamiut pisiaringajakkaat
Naak suliani nunanut allanut sillimaniarnermullu politikkimut tunngassuteqartuni nunatsinni Naalakkersuisut ilisimatinneqartarnissaannik Danmark isumaqatigiissuteqarfigineqaraluartoq, Kangilinnguit ammaqqinneqarnissaannut kinamiut aningaasalersuisartut sunniuteqarsimanerat Naalakkersuisunut ilisimatitsissutigineqarsimanngilaq.
Partiit illersornissaq pillugu isumaqatigiissuteqartut tassaapput, danskit naalakkersuisui, Socialdemokraatit, Dansk Folkeparti, Liberal Alliance aamma De Radikale.
