Kinamiut piserusuttut pillugit ataatsimiititaliaq ilisimatinneqarsimanngitsoq

Nunanut allanut sillimaniarnermullu ataatsimiititaliaq kinamiut kangilinnguanik piserusussinnaasimanerannik ilisimatinneqarsimanngilaq. Ataatsimiititaliami siulittaasoq suliaq pillugu Naalakkersuisunut maanna apeqquteqaateqarniarpoq.
Assi © : KNR
Allattoq Ivik Kristiansen, Thomas Munk Veirum
decembarip 15-at 2016 13:02

Kinamiut Kangilinnguinik piserusussinnaanerat pillugu nunanut allanut sillimaniarnermullu ataatsimiititaliami siulittaasup Inuit Ataqatigiinneersup Ane Hansenip siulittaasuunerani ataatsimiititaliaq ilisimatinneqarsimanngitsoq, Ane Hansen KNR-imut oqarpoq.

Kinamit Kangilinnguinik piserusuttoqarsimassappat Naalakkersuisut peqataatinneqarsimasariaqaraluartut Ane Hansen isumaqarpoq.

AAMMA ATUARUK Kangilinnguit kinamiut pisiaringajakkaat

Taamaammat Naalakkersuisut peqataatinneqarsimanersut paaserusullugu Ane Hansen Naalakkersuisunut apeqquteqaateqarniarpoq.

- Danskit naalakkersuisui Nunatsinnut tunngassuteqartut tamaasa Nunatsinnut oqaloqatigiissutigissavaat. Kisimiissinnaanngillat, Ane Hansen oqarpoq.

Kinamit Kangilinnguinik pisinissamik soqutiginninnermik Nunanut allanut naalakkersuisoqarfik illersornissamut ministereqarfimmit paasissutissinneqarsimanngitsoq nunanut allanut pisortaqarfimmi pisortap Kai Holst Andersenip KNR-imut oqaatigaa.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq