Kinamiut akilernerlutat politikkerit avissaartuussutigaat

Nunat allamiut Nunatsinni sulisinneqalersussat inuuniarnerisa atugaasalu mianerineqarnissaat Inatsisartuni partiit assigiinngitsunik isummersorfigaat. Assersuutigalugu Kinamiut Nunatsinni sulisinneqartussat akissarsialutsinneqarnissat, Inuit Ataqatigiit Siumukkullu akuersaarsinnaanngikkaat, Demokraatit Atassutikkullu oqarput, Alcoap nammineerlutik akissarsiarititassatut siunniussai naammagineqartariaqartut.

Nunatsinni ingerlatassat angisuut pilersinneqarneranni sinaakkutissatut piumasaqaatit Inatsisartuni sapaatip akunnerata naalernerani oqaluuserineqarput.

Oqaluuserineqarluartut ilagaat, nunat allamiut Nunatsinni sulisussarsiarineqarunik taakku akissarsiassaat Nunatsinni sulisartut akissarsiaannit minnerusariaqarnerat, tassami tamanna nalunaarusiami saqqummiunneqartumi taama allassimammat.

Nunat allamiut ajornermik akissarsitinneqartassanngitsut Siumup gruppeata nalunaarutigaa.

- Siumumi isumaqarpugut, naligiimmik aammalu inuiaqatigiinnut ataqqinassusilimmik kiinnerluta periuseqarlutalu ingerlatsissasugut, Siumup oqaaseqartartua, Akitsinnguaq Olsen oqarpoq.

Naalakkersuisut siunnersuutaat Inuit Ataqatigiit aamma isumaqatigisinnaannginnerarpaat:

- Uangut anguniarparput suliat assigiit akissarsiat assigiit, Inuit Ataqatigiit oqaaseqartartuat, Naaja Nathanielsen oqarpoq.

Inatsisissatut siunnersuummi, Naalakkersuisunit suliarineqarsimasumi ilaatigut ima allaqqasoqarpoq: 'Akissarsititsinerit atorfinitsitsinerillu qanoq ittut akuersaarneqarsinnaanersut Naalakkersuisut aalajangersinnaavaat'.

Inatsisissatut siunnersuut taanna aamma allanngortinneqartariaqartoq, Inuit Ataqatigiit piumasaraat.

- Nunat allamiut sulilersussat atugarisaasa akissarsiaasalu ajornerulersinneqarnissaat isumaqatiginngilluinnarparput. Taakkulu atorfinitsinneqarneranni akissarsiaasalu qaffasinnerpaaffilerneqarneranni Naalakkersuisut kisimik aalajangiissanngitsut isumaqarpugut, sulisitsisullu tamatumunnga peqataatinneqarnissaat pisariaqarsoralutigu, Naaja Nathanielsen oqarpoq.

Inuit Ataqatigiit aaqqiissutaasinnaasunik siunnersuuteqarput, soorlu akissarsiat ikippata taava akileraarut taakkununnga annikillisinneqassasoq siunnersuutigalugu. Taamaalilluni Nunat allamiut Nunatsinni pissutsinut naleqquttumik pineqarnissaat isumannaarneqarluni.

Partiinilli talerperliusunit oqariartuut allaaneroqaaq.

Nunat allamiut inuuniarnerisa appartinneqarnerannik oqalunneq oqaluuserisami atorneqarsinnaanngitsoq, Demokraatit oqaaseqartartuata, Michael Rosingip oqaatigaa.

- Kinamiut sulisartut nunamut atugarissaarfiunerusumut nuuttussaapput. Nunaminni akissarsiarisartagaannut naleqqiullugit maani akissarsiarissaarnerusussaapput, taamaattumik atugarisaasa ajorseriarnissaannik oqalunneq takujuminaappoq, Michael Rosing oqarpoq.

Michael Rosingip ilanngullugu oqaatigaa nunat allamiut Nunatsinni sulisartunit akissarsiaat minnerusariaqartut, erseqqissaatigaluguli tamanna atuutsinneqassasoq suliap aallartisarneqarnerinnaani, atukkalli allat nunatsinni atukkavut assigissagai oqaatigalugu.

- Kinamiut atugarilerumaagaat Nunatsinni ullumikkut atukkatsitut issikkoqassapput, tassa avatangiisit peqqissusaallu eqqarsaatigalugit, Michael Rosing oqarpoq.

Alumiiniumik aatsitsiviliorniarnerup aallartisarneqarnerani, Alcoap tungaaniit nunat allamiut akissarsiakitsullu sulisorineqarnissaat pingaartinneqarpoq.

Atassummillu tamanna ajoqutissaqartinneqanngitsoq oqaatigineqarpoq.

- Alcoap piumasaqaataasa Nunatsinni atuutsinneqarnissaat ajoqutissaqartissorinngilarput, Siverth K. Heilmann saqqummiinermini ilaatigut taama oqarpoq.

Kattusseqatigiit Partiiata Inatsisartuni ilaasortaatitaata, Knud Fleischerip oqaatigaa, Inuit Ataqatigiit Siumukkullu isumaqatigalugit, tassa nunat allamiut Nunatsinni sulisartut akissarsiaasa asserluinnaanik akissarsiaqartinneqassasut oqaatigalugu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat