SIUNNERSUUT Kinaassutsimut allagartaq atorlugu pisinnaatitaaffiit qulakkeerneqassapput

Innuttaasut piffissami sivisuumi nunani allaniinnerminni Nunatsinni pisinnaatitaaffippaalussuatik annaasarpaat.

Soorlu assersuutigalugit ilinniagaqartut, sivisuumik napparsimallutik Danmarkimi katsorsartittut aamma innarluutillit Danmarkimut nuutsinneqarnikut. 

Taakku Nunatsinnut uteraangamik inatsisit malittarisassallu minnerpaamik 50-iusut naapertorlugit Nunatsinnut attuumassuteqaleqqeqqaarlutik aatsaat allatulli pisinnaatitaaffeqalertarput.

Kinaassutsimullu allagartaqalerpat, taanna allaffisornermut innuttaasunillu utersimasunut pisariillisaataassasoq, Demokraatineersoq Michael Rosing nassuiaavoq.

- Soorlu kommunimut Inatsisartunullu qinersisarnermi, ilinniarnersiutisiaqalernissami, initaarniarnermi meeqqerivimmiittuuteqalerniarluni aamma piniarnermut allagartartaarnissamut, Michael Rosing erseqqissaavoq.

Allagartat kinaassutsimut uppernarsaatit innuttaasunut 55.000-it missaaniittunut naqinneqassappata 364.000 koruunit 2,7 millionit koruunillu akornanni akeqassasoq, Naalakkersuisut 2004-mi allapput.

Aningaasartuutilli taakkuinnaanngillat. Allaffissornikkut aningaasartuutip qanoq annertutiginissaa ilanngullugu tassani naatsorsorneqanngilaq.

- Allagartanik kinaassutsimut uppernarsaateqalernermi ataavartumik aningaasartuuteqartoqartassaaq. Ilanngunneqartariaqarporlu kalaallit innuttaasut amerlasuut pasimik pisariaqartitsiuassammata, aamma allagartat kinaassutsimut uppernarsaatit nutarterneqartariaqassammata, Naalakkersuisut taamani oqarput.

Inatsisartut siunnersuummut tapersiipput aappassaaneerneqartussanngorlugulu ingerlateqqillugu.