Kinaassutsimik isertuussilluni chatikkut Tusaanngamit siunnersorneqarneq ammarpoq
Meeqqat inuusuttullu siunnersorneqarnissamik tuppallersarneqarnissamik oqaloqateqarnissamilluunniit pisariaqartitsisut, digitalip silarsuaani aaqqissuussamik nutaamik atuillutik inersimasumik oqaloqateqarsinnaalerput.
Meeqqanut inuusuttunullu naalakkersuisoqarfik tusagassiutinut nalunaarummi taama allappoq.
Manna tikillugu 80 11 80-imut sianerlutik imaluunniit 1899-imut SMS-erlutik meeqqat inuusuttullu siunnersorneqarsinnaapput.
Chattikkulli periarfissaq nutaaq ullumikkumiit atorneqarsinnaalerpoq, taassuminnga atuinermi kinaassutsimik isertuussisutut misigineq annertuneruvoq telefon normoqarani saaffiginnittoqarsinnaanera peqqutigalugu. Tassunga ilutigitillugu meeqqat inuusuttullu nunatta avataani najugalit akeqanngitsumik kalaallisut aamma siunnersorneqarsinnaalerput.
- Meeqqanut inuusuttunullu takutikkusupparput Tusaannga tassaasoq ullormi unammillernartitat suugaluarpataluunniit, assersuutigalugu asannilerneq imaluunniit timip inerikkiartornera pillugu tapersersorneqarsinnaasut, meeqqanut inuusuttunullu Naalakkersuisoq Aqqaluaq B. Egede (IA)taama oqarpoq.
Kinaassutsimik isertuussillutik ikioqatigiit
Digitalimik pilersitaq Danmarkimi Børnefondip nittartagaani periuserineqartoq assigalugu aaqqissugaavoq. Meeqqat inuusuttullu sammisat assigiinngitsut pillugit, unammillernarsinnaasullu assigiinngitsut qanoq iliuuseqarfigisinnaanerlugit nittartakkami paasissutissanik siunnersuutinillu ujartuisinnaapput, taamaalillutillu toqqaannanngikkaluamik aamma siunnersorneqarsinnaallutik
Qupperneq "Imminut ikiornissamut ikiuineq"-mik taaguuteqarpoq, artornartullu pillugit oqaloqateqarnissamut piareersimanngitsunut tulluarsagaalluni. Børnetelefonip nittartagaa assigalugu siunnersuisarfittut aaqqissuussaq “Ikioqatigiitta”-mik taaguutilik aamma saqqummiunneqarpoq, tassani meeqqat inuusuttullu ukioqatiminnit kinaassusertik isertuullugu siunnersorneqarsinnaapput.
- Tusaanngap namminneq misissuineranni aamma nalunaarusiami Qamanimi paasivarput meeqqat inuusuttullu ajornartorsiutitik pillugit ukioqatiminnik oqaloqateqarnissartik orniginartinnerusaraat, tamannalu Tusaannga.gl-imi periarfissaalerpoq. Aqqaluaq B. Egede oqarpoq.
Nuna tamakkerlugu siunnersuisarfiup Tusaanngap annertusarneqarnera, Danmarkimi Børns Vilkår suleqatigalugu aaqqissuunneqarpoq.
