Kina qinigaava, aamma kina qinigaanngitsoorpa?
Qinersinermi ajugaasumi Siumumi qulingiluanik ilaasortaatitaqarsimasumi 14-inillu ilaasortaatitaqalersumi arlallit nutaartaapput, aammali partiimi sullissilluarsimasut marluk tupaallartumik qinigaaqqinngitsoortut tassaallutik, ukiorpassuarni Inatsisartuni ilaasortaasimasoq Ruth Heilmann Maniitsumeersoq aamma Siumup aningaasaqarnermut oqaaseqartartua Per Berthelsen Nuummeersoq.
Taakku ilaasortaaginnarsinnaanerminnut naammattunik qinerneqanngillat. Taamaattorli Siumut qularnanngitsumik Naalakkersuisunngortitsippat, sinniisussatut ilaasortanngornissamut periarfissarissaarlutik.
Tamatumunnga taarsiullugu Siumup partiimik pilersitseqataasoq Nunatsinnilu naalakkersuinermik misilittagartooq Lars Emil Johansen qinikkatut uteqqinnerani tikilluaqqusinnaanngorpa, 400-nik qinigaalluni ilaasortanngorami. Angut taanna 66-inik ukiulik Nunatsinni qinikkani qullersat akornanni ukiuni 40-ni landsrådimi ilaasortatut, inatsisartuni ilaaasortatut, naalakkersuisuni ilaasortatut, naalakkersuisuni siulittaasutut qinigaaffinnilu arlalinni folketingimi ilaasortatut misilittagaqarpoq.
Siumup folketingimi ilaasortaatitaa Doris Jakobsen qinigaaqqippoq. Qinigaaqqittunut ilaallutik Finn Karlsen, Kristian Jeremiassen, Karl Lyberth aamma Kim Kielsen. Siumup ilaasortanngortitaasa nutaat akornanniipput Upernavimmi borgmesteriusimasoq Jens Immanuelsen, Vittus Qujaukitsoq aamma Jens-Erik Kierkegaard tamarmik Nuummeersut, Nikolaj Jeremiassen Niaqornaarsuk aamma Karl Kristian Kruse Niaqornat aamma Evelyn Frederiksen Sisimiuneersoq.
Partiip naalakkersuisuni siulittaasuutitarisimasaa Hans Enoksen Siumumi qinigaanerpaamut tulliulluni 623-nik qinerneqarluni qinigaaqqippoq.
Inuit Ataqatigiit 14-inik ilaasortaatitaqaraluarlutik aqqanilinnik ilaasortaatitaqalersut, partiimi nuimasunik arlalinnik ilaasortaatitaqarunnaarput tassaasunik Olga Poulsen Berthelsen, Harald Bianco, Isak Hammond aamma Kaali Olsen.
Taakkununnga taarsiullugu IA sinnerlugu nutaamik ilaasortanngortut tassaallutik partip folketingimi ilaasortaatitaa Sara Olsvig IA-mi qinigaasuni pingajunngorluni 1.030-nik qinerneqartoq aamma Kalistat Lund Narsameersoq, qinersineq sioqqullugu Siumumit anilluni IA-mut ilaasortanngortoq.
Maliina Abelsen aamma qinigaalluarpoq, 1.334-nik qinerneqarluni Inuit Ataqatigiinni qinerneqarnerpaamut tulliugami taamalu taamaallaat Aleqa Hammondimit aamma Kuupik V. Kleistimit qaangerneqarluni.
Inuit Ataqatigiit ilaasortaatitaanni qinigaaqqipput Hans Aronsen, Aqqaluaq B. Egede, Agathe Fontain, Ane Hansen, Juliane Henningsen, Naaja Nathanielsen aamma Mimi Karlsen.
IA-mi nuimasut ilaat Naalakkersuisuni ilaasortaq Ove Karl Berthelsen aamma matumani Inatsisartunut qinigaanngitsoorpoq. Soorlu aamma IA-mut nuuttuni kingulleq Astrid Fleischer Rex aamma qinigaanngitsoortoq.
Atassut marlunnik ilaasortaatitaqalerpoq. Partip ukiorpassuarni ilaasortaatitaa Siverth K. Heilmann qinigaaqqippoq nutaamillu ilaasortaqatigilissallugu Steen Lynge Nuummeersoq, tassa Knud Kristiansen taarserlugu ilaasortanngorami. Partip siulittaasua Gerhardt Petersen qinigaanngitsoorpoq.
Demokratit ilaasortaatitaat sisamaagaluartut affaannanngorlutik marluinnanngorput. Partip siulittaasua Jens B. Frederiksen aamma Palle Christiansen qinigaaqqipput. Qinigaaqqinngitsoortullu tassaallutik Justus Hansen Tasiilameersoq aamma Andreas Uldum Nuummeersoq.
Partii Inuit marlunnik ilaasortaatitaqalerput, taamaalilluni partip siulittaasua Nikku Olsen aamma Randi Broberg Inatsisartuni ilaasortanngornerminnik imminnut pilluaqqusinnaanngorput.
