Millioninik tapiisoqarneragut KNR-imi nangeqattaartunik aallakaatitassiortoqartoq
Nunatsinni innuttaasut sananeqaatimikkut kingornuttagaat, sermersuarmi qupparsuit imaluunniit timit paniinnarnikut ukiunik tuusintinik pisoqaassusillit ilisimatusartunit misissuiffigineqaraangata ulluinnarni pisuniit ungasikkajuttarput. Taakku paasisat ilisimatusartunuinnaq tunngassuteqanngillat – uagummi tamatta pineqarpugut.
Taamaammat ilisimatusartarnerit innuttaasunut tamanut paasisaqarfiusinnaaqqullugit radiukkut podcastitullu aallakaatitassiaq nangeqattaartoq Nunarsuup avannaanit ilisimasat, KNR-ip maanna aallakaatittalerpaa. Nangeqattaartut Carlsbergfondip 1 millionit koruunit sinnilaarlugit aningaasaliineratigut piviusunngorput. Taama tapiissuteqartoqarneratigut nunarput pillugu ilisimalikkanik ingerlatitseqqiisoqarsinnaangorpoq.
– Nunarput aallaavigalugu ilisimatusarnernik tusartinneqartarnissarput pingaaruteqarpoq. Taamaalilluta pisimasut, massakkut pisut aamma siunissarput pillugu paasisimasaqarnerulissagatta, aallakaatitassioqataasoq Nathan Kreutzmann oqarpoq, taanna Mads Malik Fuglsang Holmilu suleqatigiillutik nangeqattaartunik suliaqarput.
Taakku marlullutik taperneqarnermikkut ukiuni marlunni tulliuttuni immikkoortunik 24-nik aallakaatitassiorsinnaanngorput. Nangeqattaartut kalaallisut danskisullu tusarnaagassiarineqartassapput. Immikkoortoq siulleq qulequtalik, ´Niuertoqarfik paatsiveqanngitsoq´, podcastinik ujarlerfigisartakkanni tusarnaarsinnaanngoreerpat.
Dronit aqqartartuniit inuit qanga pinnguaataannut
Nunarsuup avannaanit ilisimasat aallakaatinneqaraangat assigiinngitsorpassuit sammineqartassapput. Nangeqattaartuni sammisassat ilagaat nunanit allaneersut ilisimatusartut sermersuarmi dronit aqqartartut atorlugit misissuisut, taakku silap pissusiata allanngorartup sermimit iminngortut ingerlaarneri qanoq sunnerneqarnersut paasiniarpaat.
Aallakaatitassiani aamma sammineqassaaq Donald Trumpip nunatta amerikanngortariaqarneranik oqariartuuteqareernerani nunarsuup sinnerata nunatsinnut soqutiginnilerujussuarnera. Timilli paniinnarnikut aamma inuit pinnguaat ukiunik tuusintinik pisoqaassusillit pissutigalugit, inuit issittumi inuunermut qanoq tulluarsallaqqitsiginerannik paasisaqarfiussapput.
– Oqaluttuarisaanitsinnik nunatsinnillu ilisimasaqarnerput kinaassutsitsinnik anguniakkatsinnillu ilusilersueqataapput. Tamanna maanna silap pissusiata allanngorarnerujussuani nunarsuartsinnilu pisorpassuit eqqarsaatigalugit pisariaqaqaaq, Nathan Kreutzmann oqarpoq.
Qanga pisut imaannaanngitsut aallarniutaasut
Nunatta nunasiaaleqqaarnerani pisut aallakaatitassiami siullermi tusarnaarneqarsinnaapput. Ukioq 1728-mi danskit kunngiat niuertoqarfimmik Godthaabimik, ullumikkut nalunngisatsitut Nuummik, pilersitsisussanik ilisimasassarsiortitsilluni aallartitsivoq.
Ilisimasassarsiornerli aallartitaaginnartoq toqorartoqarpoq aamma nakuusernerit inuillu akornanni ajorsaarinerit pillutik. Kalaallit danskinik norskinillu nunasisunik naapitsinerat aallakaatitami paasisaqarfigineqarsinnaavoq – aammali niuertoqarfimmik ingerlalluartumik pilersitsinissamik takorlukkap uumaniapiloornermik kinguneqarnera.
– Ilisimatusartut saaffigisatta paasisimasaminnik avitseqatigerusuttorujussuuaatigut. Inuillu aallakaatitassianik pissanganartunik, eqqarsaammernartunik aamma pingaarutilinnik tusarnaarusussasut neriuutigaarput, Mads Malik Fuglsang Holm oqarpoq.
Nunarsuup avannaanit ilisimasat KNR radiokkut aallakaatinneqartassaaq, immikkoortorlu siulleq aallakaatitsivinni nalinginnaanerpaani podcastitut tusarnaarneqarsinnaanngoreerpoq.
