Kim Ujarak Lorentzen Tuluit nunaanni ajugaavoq
Nunatsinni nukittunersaq Kim Ujarak Lorentzen imaannaanngitsumik angusaqaqqippoq.
Nunanit tamalaaneersut nukittuneqqusaanneranni Arnold Sportsfestivalimi angusat katinneranni ajugaavoq.
Kivitseriaatsimi log-mi 140 kilo kivittaarneqarpoq tassanilu tallit qummut siaarlugit kivitsisaarnermi minutsip ataatsip iluani kivinneqartut amerlaneqqusaanneqarput.
- Tassani arfinileriarlunga kivitsivunga, logimi ajugaasoq Kim Ujarak Lorentzen KNR-mut oqarpoq.
Kivitseriaatsimi dødløftimi unammeriaaseq aamma taamaappoq tassanilu 300 kilo kivittaarneqarpoq. Kim Ujarak Lorentzenip kivitsineri qulit akuerineqarput.
- Aqqanileriarlugu kivikkaluarpara, kisianni dommeri akuersilluni suli nalunaanngitsoq kivittagaq ataasiarlugu iligakku. Taanna akuerineqarsimasuuppat dødløftimi ajugaasup kivitaasut amerlatigisunik kivitsimassagaluarpunga, Kim Ujarak Lorentzen oqarpoq.
AAMMA ATUARUK Kim Ujarak Lorentzen nunarsuarmi nukittoorsuarnut unammilersoq
Taamaasilluni angusat katinneranni ajugaasuuvoq.
Nukittuneqqusaanneq Arnold Sportsfestival Birminghamimi pivoq timersortarfiit nukittuneqqusaattarfiit nunarsuarmi anginersaasa ilaanni. Billetit tamarmik nungunneqarput ullullu pingasut ingerlaneranni 60.000-it missaanniittut isiginnaariarput.
Kim Ujarak Lorentzenillu maannamut angusarisagai arajutsisimaneqanngillat.
Kim assiliseqatigiumavaat
Kim Ujarak Lorentzenillu maannamut angusarisagai arajutsisimaneqanngillat.
- Nukittuneqqusaattarnerit Tuluit Nunaanni nuannarineqartorujussuupput. Arlalissuit atera tusareersimavaat assiliseqatigerusuttarlungalu, Kim Ujarak Lorentzen oqaluttuarpoq.
Arnold Sportsfestivalimik aaqqissuisut aamma Kim Ujarak Lorentzenip Tuluit nunaanni angusai nersualaarpaat.
- Apersulereerpaannga nunarsuarmi pissartanngorniunnermut peqataarusunnersunga taamaassappat ikiorusullunga assersuutigalugu unammiffissamut USA-mut isersinnaanissaq eqqarsaatigalugu, Kim Ujarak Lorentzen oqarpoq.
AAMMA ATUARUK Rekordi nutaaq: Taatsi Gabrielsenip 360 kilo kivippaa
Taassuma assut aamma Fitnessgl Nunatsinni nukittuneqqusaannermik aaqqissuisut qujassutissaqarfiginerarpaa taannaammat nunani tamalaani unammiartortarnerminut tapersersuisoq.
AAMMA ATUARUK Rekordiliisoq: Kim Ujarak Lorentzenip 401 kilo kivippaa
Kim Ujarak Lorentzen naalagaaffeqatigiinnermi rekordiliilluni siorna 401 kilo kivimmagu matut nutaat ammarput. Nunani tamalaani unamminernut qaaqqusaasalerpoq maannalu angusarissaaqqikkami nukittuneqqusaannernut allanut unammiartarnissaq periarfissarilerpaa.
- Aap, taamaappasippoq, Kim Ujarak Lorentzen tunuarsimaarpalulluni naggasiivoq.