Kim Ujarak Lorentzen nunarsuarmi nukittoorsuarnut unammilersoq
Nukittoorsuit 32-it nunanit tamalaaneersut nukittuneqqusaannermi Arnold Sportsfestival-mi Tuluit Nunaanni peqataassaapput, unamminerlu Arnold Schwarzeneggerimut atsiussaavoq.
AAMMA ATUARUK Rekordiliisoq: Kim Ujarak Lorentzenip 401 kilo kivippaa
Nunatsinni nukittunerpaaq Kim Ujarak Lorentzen peqataassaaq angunniullunilu unamminermi angusarissaarluarpoq.
- Internet atorlugu anngunniuppugut kivitseriaatsimi dødløftimi minutsip iluani kivinneqartut oqimaaluttaat amerlassusaallu unammissutigalugit. Taamatuttaaq kivitseriaatsimi logimi unammivugut. Anngunniuttuni ajugaasuuvunga, Kim Ujarak Lorentzen KNR-mut oqarpoq.
400 kilo kiveqattaarpaa
Peqataasut 22-it Arnold Sportsfestival-mut toqqaannartumik qaaqqusaapput peqataasullu sinneruttut qulit anngunniuteqqaartussaallutik.
AAMMA ATUARUK Kim Ujarak Lorentzen Nuummi timersullammanngorpoq
Kim Ujarak Lorentzen Sverigemi nukittuneqqusaattuni aasaq unammeqataavoq tamannalu sungiusarneranik qaffariaataavoq.
- Sverigemi unamminitta kingorna marloriarlunga 400 kilo kivippara. Taamaattumik siornamut sanilliullugu siuariaateqangaatsiarnikuuvunga, Kim Ujarak Lorentzen oqarpoq.
Nukiilu piffissap sivikitsup ingerlanerani ilungersuangaatsiartussanngorput.
AAMMA ATUARUK Danmarkimi nukittunerpaap Kim Ujarak Lorentzen unammillerpaa
Nunatsinni nukittuneqqusaanneq Greenland Strongest arfininngorneq septemberip 25-at Nuummi timersortarfissuarmi Inussivimmi pissaaq. Danmarkimi nukittunerpaaq Emil Jensen Kim Ujarak Lorentzenimut toqqaannartumik unammilleriartorluni tikissaaq.
- Tuluit Nunaanni unamminissamut qilanaartorujussuuvunga, allaat Greenland Strongest tunulliukkusukkaluarlugu, Kim Ujarak Lorentzen oqarpoq.
- Piffissap sivikitsup iluani timera tamaviaartorujussuusussaavoq. Nukissakka sipaarusukkaluarpakka kisianni soriarsinnaagunanngilara, Kim Ujarak Lorentzen oqarpoq.
Unammersuarneq Arnold Sportsfestival kivitseriaatsini dødløftimi aamma logimi nunarsuarmi nukittuneqqusaannertut isigineqarpoq.
