Danmarkimi nukittunerpaap Kim Ujarak Lorentzen unammillerpaa
Naalagaaffeqatigiinni kina nukittunerpaajunersoq timersortarfissuarmi Inussivimmi Nuummiittumi septemberip 25-at paasinarsissaaq.
Danmarkimi nukittunerpaanngortoq Emil Jensen Nunatsinni nukittunerpaanut unammiartorluni Nuummukarnissaminut akuersivoq.
- Assorujussuaq alutornassaaq Danmarkimi nukittunerpaaq aamma Nunatsinni nukittunerpaaq toqqaannartumik Inussivimmi septemberip 25-at unnukkut unammilerpata, Greenland Strongest 2021-mik aaqqissuisoq Allan Juhl Fitnessglimik piginnittoq oqarpoq.
AAMMA ATUARUK 410 kilo – tassa Kim Ujaraap rekorditaava
Aaqqissuisut aamma Nunatsinni coronartoqarneranik pissutsinut inuillu katersuussinnaanerannut malittarisassanut atuuttunut malinnaaqqissaarput. Pissutsit ullumikkutut itsillugit Inussivimmi issiaviusinnaasut tamarmik septemberip 25-at inuttaqarsinnaapput.
- 2019-mi nukittuneqqusaatsitsigatta 1.400-nik isiginnaartoqarpoq. Pikkunaqaaq. Neriuppunga tamanna ukiormanna aamma pisinnaassasoq, Allan Juhl oqarpoq.
Kim Ujarak Lorentzenip nukittuneqqusaattarnermi siuariartornera maluginiarneqarpoq Ukiormannalu Sverigemi nukittuneqqusaannermut qaaqqusaavoq angusani tunngavigalugit aammalu kivitseriaatsimi dødløftimi naalagaaffeqatigiinni oqimaannerpaamik kivitsisimanini pillugu tassami 401 kilo kivereernikuuaa.
AAMMA ATUARUK Kim Ujarak Lorentzen Nuummi timersullammanngorpoq
- Kim Ujarak Lorentzen rekordiliimmat oqarput avataaniit tikittoqartalerumaartoq. Tamanna maanna aallartippoq, Allan Juhl oqarpoq.
Greenland Strongest 2021 Uummannamiit, Ilulissaniit, Aasianniit Nuummiillu peqataaffigineqassaaq.
Unammineq KNR-TV-mi toqqaannartumik aallakaatinneqassaaq.
AAMMA ATUARUK Rekordiliisoq: Kim Ujarak Lorentzenip 401 kilo kivippaa
